KHAWTHLIR

Thisen pe

Hrangbana College NSS chuan nimin khan blood donation camp an huaihawt a, Civil Hospital, Aizawl blood bank tan thisen unit 92 an pe a, petute mipa 76 leh hmeichhia 16 an ni. Mizoram UPC Keifang bial PYD mipa 13 leh hmeichhia pariatten Civil Hospital Aizawlah thisen unit 21 an pe bawk.

MLA-in lirthei pe

Aizawl West-III bialtu MLA VL Zaithanzama chuan nimin khan a biala Lawipu Branch YMA hnenah Maruti Suzuki, Super Carry a hlan a; "Aizawl West III-ah veng pakua a awm a, MLA fund kan hmannaah veng lian leh tê kan thliar ngai lo a, rualkhai taka sem rual hi sorkarna kan chan hma pawha kan kalpui dan a ni," a ti.

Ui/ar insualtir khap

Aizawl district-ah pawisa thàpa ui leh ar insualtir ṭhin an awm avangin Aizawl district magistrate Lalhriatpuia chuan thupek a tichhuak a; Aizawl district-ah pawisa inchawia ran insual khap a nih thu a puang. Thuek bawhchhiate chu pawisa chawitir leh thla thum thleng tàntir theih an nih thu a tarlang.

Red Ribbon Quiz

Lawngtlai District AIDS Prevention and Control Committee leh District Education Office chuan nimin khan LADC Hall-ah district level Red Ribbon Quiz Competition an buatsaih a, sikul pariat an tel. Ngurnunsangi English School chu pakhatna an ni a, state level inelnaah district ai an awh ang.

Ramthar Ni

Naktuk August 31 hi Mizoram Presbyterian Kohhran ‘Ramthar Ni’ a ni a, thupui 'Pain kei mi tír ang bawkin ka tirh che u hi' tih hmangin Presbyterian kohhrante'n an hmang dawn. Kum 1972-a Synod Inkhawmpui rorel angin Mizoram Synod hnuaia kohhrante chuan kum 1973 aṭang khan Mizorama Presbyterian Kohhran dintu Zosap­hluia'n (Rev. David Evan Jones) Mizoram a thlen ní, August 31-ah Ramthar Ni an hmang ṭhin a ni.

MZU Road Race

Mizoram University chuan nimin zing khan National Sports Day pualin an campus-ah Fit India Movement Road Race an buatsaih a, vice chancellor Prof. Dibakar Chandra Deka-a'n khuhhawnna hun a hmang. Road Race-ah hian MZU-a zirlai leh thawktute an tel a ni.

Zirlaite CPR zirtir

ZMCH-a Anaes-thesiology & Intensive Care Unit department, Indian Society of Critical Care Medicine Aizawl City Branch leh Indian Resuscitation Council Federation ten nimin khan 'The School CPR Program' hnuaiah Melriat High School-ah cardiopulmonary resuscitation (CPR) tih dan an zirtir. Melriat H/S zirlai 46 leh zirtirtute an tel a ni.

Hmalakna hrilhfiah

Rural Development department chuan nimin khan an conference hall-ah T Romana College-a Department of Sociology final year zirlaite tan RD hnuaia hmalakna hrang hrang inhrilhfiahna an buatsaih a, RD minister Prof. Lalnilawma'n a hmanpui. Zirlaite chu MGNREGS, MzSRLM, Social Audit Unit, BADP/SASCI/RMIS te, WDC-PMKST 2.0 leh PMAY-G/SAGY chungchang hrilhfiah an ni.

Meth leh heroin man

Assam Rifles leh CID (Crime)-a Special Narcotics Police Station mite chuan August 28, Ningani zan khan Zemabawk South-ah mi pahnih hnen aṭangin methamphetamine kg. 7 an man a; Special Narcotics PS-in thubuai an ziak lut. Ningani zan vêk dar 6 vel khan Lunglawn Kawizau chhakah police-te'n C Lalkrossthanga (25) s/o C Sangluaia, Ngharchhip, Hnahthial district hnen aṭangin heroin (no. 4) hawng 5 an man a; heroin leisaktu Rebecca Lalzawmngheti (24) w/o PC Rosangzuala, Lunglei Rahsi Veng an man tel bawk.

AR in man pek a la ni lo

GAD changtu chief minister Lalduhoma chuan, Assam Rifles hnenah Aizawla an hmun chhuahsan tâka in (building) hrang hrang man sorkarin a la pek loh thu a tarlang. Chief Minister-in Assembly session neih zawh taka MNF member Ramthanmawi zawhna ziaka a chhan danin, Assam Rifles chhuahsan in man atan sorkarin sum a la sêng lo a; in man pek ngai lo tura Ministry of Home Affairs an ngenna chu ngaihtuah mek a ni.