SIPMIU hmanga hnathawhte UDPA-in PHE hnenah an hlan

SIPMIU a tawp tawh a, Aizawla SIPMIU thil siam (project) hrang hrangte chu nimin khan Urban Development & Poverty Alleviation department chuan Public Health Engineering department hnenah an hlan.

Project inhlan chhàwnna hi PHE minister Prof. Lalnilawma pisaah neih a ni a; Tlawng lui (Setlak lui chhuah)-a Aizawl châwmtu tui lâkna - Augmentation of Water Supply and Construction of 37 mld Water Treatment Plant te, Chite-a 10 MLD Sewage Treatment Plant te, Primary and Secondary Sewerage Network te an inhlan chhâwng.

Ministry of Housing and Urban Affair (MoHUA) aṭanga hmuh cheng vbc 237.91 hmanga siam Tlawng lui Setlak lui chhuaha Aizawl chawmtu tui lakna hi SIPMIU-in kum 2016 aṭangin an siam ṭan a, siam zawh tawh niin, September 26, 2023-ah tui pump ṭan a ni.

Aizawl chhuahlama vengte zun-ek thli sawngbawlna Sewage Treatment Plant chu cheng vbc. 26.76 hmangin kum 2013-ah siam ṭan niin, February 6, 2021-ah siam zawh a ni a; Aizawl chhuah lam veng 19-a zun-ek thlite lak khawma sawngbawl mek a ni.

Sewage Treatment Plant, Chitea zun-ek thli lak khawm pipe phûm - dewarage network, km 28.26-a thui pawh PHE hnenah hlan a ni. Dewarage network siam nan hian cheng vbc. 56.76 hman niin, siam zawh a ni tawh a, in 5,238 thlun zawm tawh niin, mi 23,868-in an hmang mek.