MCON-in Graduation & Lamp Lighting hmang; Malsawmna ni turin nursing zo tharte chah
Mizoram College of Nursing (MCON) chuan nimin khan an hmunah Graduation & Lamp Lighting Ceremony vawi 38-na an hmang a, minister K Sapdanga'n a hmanpui. Minister chuan, BSc (Nursing) zirte chu an thutiam nunpui tur leh mi dang tan malsawmna nih tum tlat turin a chah.
K Sapdanga chuan, nurse hna chu khawvelin a mamawh leh hna ropui a nih thu a sawi a, "Zirlai tharte'n nurse thutiam in sawi rualte kha by-heart mai loin, nunpui tlat ang che u. Khawvelin hma a sawn zel a, chumia kan intlansiakna chu quality a ni," a ti a; nursing an zirnaah a sang ber nih tum tur leh hman tlak thiamna zir chhuak ngei turin a fuih.
Nursing zir zo tharte a lawmpui thu sawiin Minister chuan, "Zirlai in zo a, khawvel tak takah in lut dawn a, in zir chhan in ti ṭan dawn. Nurse-te hian hna hmu kher lo mah u la, in chhungkhur leh khawtlangah in thiamna a mamawhna a sang em em a, mi dang tan malsawmna nih tum ang che u," a ti a; India ram hmun hrang hranga damdawi-inah Mizo nurse-te an hmingṭhat ṭhin bthu sawiin, nurse zo tharte chu an thawhna apiangah missionary hna an thawk tel a ni tih hre turin a chah.
Home Minister chuan, zirlai nu leh pate chu an fate lakah no lutuk lo turin a chah a, "Khawi hmunah pawh thawk dawn se, in fate hian an thei dawn. Nu leh pate hian kan fate hna thawhna hmun tur kan duhtuipui ṭhin lutuk. Sorkar hnaahte pawh an la lut ang, sorkar hnathawk zingah hrisel lohna chhuanlamin Aizawl emaw, district khawpuiah emaw kher sawn dil an tam ṭhin a, sorkar tan a buaithlak ṭhin," a ti a; nurse-te'n an ṭangkaina hmun turah tak zel an thiamna an hman theih nan khawi hmunah pawh an awm an nu leh pate'n an phal a ngaih thu a sawi.
Graduation & Lamp Lighting Ceremony-ah hian Mizoram State Cancer Institute nursing superintendent Lalrinpari kaihhruaiin zirlai tharte'n khawnvar chhíin nurse thutiam an sawi rual a; zirlai pass thar mi 30 hnenah lawmpuina leh zirlai ti ṭha zualte hnenah chawimawina hlan a ni.
MCON principal Lalduhsaki chuan, September 2025 aṭangin MCON-ah Post Basic BSc (Nursing) ṭan a ni dawn a, kum 2026-ah MSc (Nursing) zirna hawn an tum tih a sawi.
MCON hi kum 2005 khan nursing school aṭangin college-ah hlankai a ni a, nimina thlah tâkte nen kum 20 chhungin mi 494-in BSc (Nursing) an zir chhuak tawh. Tunah zirlai 129 an awm mek a, chu'ng zinga 11 chu PM’s Scholarship Scheme hnuaia Jammu & Kashmir leh Ladakh aṭanga rawn zirte an ni.