Aizawl west by-pass road laih mek chawlhtir turin Aizawl DC an ngen

Aizawl tlak lama khawpui hêlna tur kawngpui (Aizawl west by-pass road) laih mek danah mihring tana pawi tura thil tih a nia ngaiin Centre for Environment and Social Justice (CESJ) chuan, kawng laih mek chawlhtir (stay) turin Aizawl District Commissioner/Magistrate an ngen.

CESJ chuan, Sihhmui - Muallungthu inkara Aizawl west by-pass road laih mek chu August 25, 2025 khan Tlawng lui kam velah an enfiah tih an sawi a, "Kan thil hmuh leh hriat aṭangin kawng laih mekin mihring tana pawi nasa tak a sawi avangin vawiin 28.08.2025 hian Aizawl DC (District Magistrate) hnenah stay turin kan ngen," an ti.

Aizawl by-pass on western side kawng laih tur hi Aizawl mipui châwmtu Tlawng lui kam zela kal tur a nih avangin May 14, 2024 khan Mizoram PWD Engineer-in-Chief leh hotu dangte nen an sawiho tawh tih sawiin CESJ chuan, 'In kawng laih vûng Tlawng luia a luh chuan National Green Tribunal-ah emaw, Supreme Court-ah emaw kan complaint dawn' tia an hrilh thu an tarlang.