Bana Kaih scheme hnuaia EMS-ah mi 10,000 chuang training pek tum

Sports & Youth Services minister Lalnghinglova Hmar chuan nimin khan ZPM member Lt. Col. Clement Lalhmingthanga zawhna chhangin, Bána Kaih (Handholding) Scheme hnuaia Empowering Mizoram Sports (EMS)-ah a bul ṭan nan mi 10,000 chuang training pek theih tura ruahman a nih thu a sawi.

Lalnghinglova Hmar chuan, Bâna Kaih hnuaia EMS hlawhtling taka kalpui a nih theih nan hmalak mek a nih thu a sawi a, "EMS hnuaia discipline kalpui theih tur thlan tawh niin, EMS web application duan mek a ni. EMS hi a taka kalpui dan tur duan a ni tawh," a ti.

EMS chu fûr ruahtui hul hunah ṭan a nih dawn thu sawiin Sports Minister chuan, Olympics 2036 thlir chungin Mizoram sorkarin sport association-te leh Mizoram infiammite chhawmdawlna a pek reng thu House a hrilh.

Zawh belhna chhangin Lalnghinglova Hmar chuan, New Champhai khelmual atan cheng nuai 12.1 hmuh a nih thu a sawi a, "DPR buaipui mek a ni a, peihfel a nih velah tender chhuah a, hna kalpui kan tum. Thenzawl atan pawh sanction kan nei," a ti.

Sports Minister chuan, Tuichangral Games leh Tuipural Games chu ZPM a sorkar chhung chuan sorkarin a ṭul angin a puih zel dawn thu a sawi bawk.