Hnahthial district CD ratio 67.48%

Hnahthial District Consultative Committee, District Level Review Committee leh District Level Security Committee chu nimin khan Hnahthial DC Meeting Hall-ah an ṭhukhawm a, additional DC Zothanmawia Khiangte-in a kaihhruai. District chhunga bank-te credit deposit ration chawhrual chu 67.48% a nih thu tarlan a ni.

Ṭhutkhawmah hian bank hotu te, sorkara a kaihhnawih department aiawhte leh pawl aiawhte an tel. Tarlan danin, Hnahthial district chhunga bank-te'n April-June, 2025 inkara deposit an hmuh aṭanga loan an pek chhuah zat tehna CD ratio chawhrual 67.48% a ni a; SBI chu 60% an phak loh deuh avangin ṭan la lehzual turin an chah.

April-June 2025 chhungin SBI Hnahthial, MRB Hnahthial, MRB Pangzawl, MRB South Vanlaiphai leh MCAB Hnahthial ten Hnahthial district-ah financial literacy camp vawi thum ṭheuh an nei a; loan rulh ṭhat loh, Non-Peforming Assets (NPA) tamna ber MSME (PS)-ah pawh 3.72% chiah a nih avangin, loan rulh a ṭha thawkhata ngaih a ni.

Lungleia Lead bank manager R Lalmalsawma chuan, zirlaite tan education loan ṭha tak a awm thu sawiin, buaipui a harsa tih vang ringawta bawhzui peih lo ṭhin lo turin mipui chu a ngen a; loan hmuh awlsam chu a pung (interest) a san ṭhin avangin loan leh thil dangte uluk taka ngaihven ṭhin turin a chah bawk.