KHAWTHLIR

Bualte-Ṭhualṭhu zawh lo turin chah

Lawngtlai additional district magistrate David Lalrinawma chuan thuchhuah siamin, Bualte leh Ṭhualṭhu inkara leimin chu thenfai ni ṭhin mah se, ruah a sûr leh ṭhin avangin a min belh zel thu a tarlang. Fûr ruahtui a hul deuh hma chu leimin awm belh reng thei a nih avangin lirthei hmanga zin ṭhinte chu he kawng hi a him loh avangin loh theih loh (emergency) a nih loh chuan zawh rih lo turin a hriattir a ni.

Residential choir conductors' training

Synod Worship Commit-tee chuan August 18-21, 2025 chhung khan Synod Conference Centre-ah Residential Choir Conductors' Training vawi 29-na an buatsaih a, mi 65 an tel. Training hi August 18 zanah Synod executive secretary Rev. Dr Rosiamliana Tochhawng-in Pathian hnenah hlanin a hawng a, Synod Music School-a instructor-te'n technical, conducting, vocal, chord, harmony chungchangte an zirtir a ni.

Sangha no chhuah

Champhai district bawrhsap Mohammad Aaquib hoin Keilungliah Management Committee chuan nimin khan Keilungliah luiah sangha chi (common carp & grass carp) 30,000 vel an chhuah. Sangha no chhuah hi Fisheries department hmalakna a ni a, Champhai DFDO Lalremsangpuii chuan, Keilungliahah nungcha leh sangha a tam thei ang ber ecosystem mil zela enkawl a duh thu a sawi.

Naupang 40 pawm

Women and Child Development Child Protection Services (Mission Vatsalya) hnuaia Serchhip District Sponsorship and Foster Care Approval Committee chu an chairman Paul L Khuma, bawrhsap hoin nimin khan an ṭhukhawm a; Serchhip district-a naupang chhawmdawl ngai rawtna 40 an pawm.

Darlak - Tuidam MMV chin tlan khap

Mamit SP Manny Bhushan Singh chuan thupek chhuakin, NH-44A (108) Darlak - Tuidam via Sabual inkar kawng siam hna thawh mek a nih avangin he kawngah hian August 23-31, 2025 chhung chu 407 truck chin chunglam tlan khap a nih thu a puang. Thupek ngai pawimawh turin SP chuan mipui a ngen a, thupek zawm lote chu hrem theih an nih thu a tarlang.

MNF MLA-te'n Dampa an tlawh

MNF MLA pathum - R Rohmingliana, Rasik Mohan Chakma leh Prova Chakma te chuan August 19-21, 2025 chhung khan Assembly by-election la neihna tur Dampa bial chhim lama khaw hrang hrang an tlawh a; an theih ang angin Dampa bial mipui ṭanpui zel an tum thu an sawi. MNF thuchhuah tarlan danin, MNF MLA pathumte hian tun dinhmunah Dampa bialin MLA nei rih loh mah se, MNF MLA-te'n an theih ang angin Dampa bial mipuite buaipui a, ṭanpui zel an tum thu an sawi a; an MLA ṭhin Lalrintluanga Sailo anga bialtu MLA ṭha an neih leh ngei an beisei thu an sawi bawk.

Dampa bial chhung mi duh

Dampa Bial Ṭhalai Pawl (DBṬP) chuan thuchhuah siamin, Dampa biala Assembly by-election awm turah an bial chhûlchhuak ngei candidate atan awm thei se an duh thu an tarlang. DBṬP chuan, Dampa bial by-election neih turah rilru fîm tak pu turin political party tin an ngen a, "Dampa bial leh ram tana ṭha ber candidate nei ṭheuh turin kan ngen," an ti. Candidate atan bial chhung mi/bial chhûlchhuak ngei ni thei se, Dampa bial dinhmun, harsatna leh hmasawnna tur hre chiang tak mi, sum leh pai, eirukna leh therhlo beisei lo mi, mi hmingṭha an duh thu an tarlang a ni.

Dan loa damdawi hralh khap

Champhai district magistrate Mohammad Aaquib chuan thupek chhuahin, Champhai district-ah damdawi khuahkhirh bik (schedule H & schedule X)-te dan loa zawrh leh pek chhuah khap a nih thu a puang a; schedule H & schedule X zawrhna dawr neitute chu CCTV vuah vek turin a hriattir. Mohammad Aaquib chuan, khapna thupek hi Champhai district-a damdawi hman sualna leh sorkarin a khuahkhirh bik damdawite dan kalha zawrh leh hralh/pek chhuah a rêm theihna atan BNSS 2023 Section 152-in thu-neihna a pek anga tihchhuah a nih thu a tarlang a; thupek zâwm lote chu BNS 2023 Section 223 hmangin hrem theih an nih thu a tarlang bawk.