Hâlpuah khapna tur dân pawm

Home minister K Sapdanga hoin nimin khan Secretariat conference hall-ah Committee on Prevention of Firecracker and Other Pyrotechnic Materials an ṭhu a; hâlpuah leh a kaihhnawih khapna tur dan thar duan mek a thuphungin an pawm.

Ṭhutkhawmah hian, kumina hunpui lo thleng tur vuakvêta hâlpuah leh a kaihhnawihte khapna kalpui dan tur te, Working Committee-in hâlpuah leh a kaihhnawihte khapna tur dan a duan thar (draft bill)-te thlirho a ni. Draft bill chu a thuphungin an pawm a, ṭhutkhawm leh huna ennawn leh turin an dah.

Meeting-ah hian kumina Krismas leh 2026 kum thar hunpui thleng turah mipui vantlang him zawkna tur leh boruak thianghlim zawk a awm theihna tura hmalak dan turte an rêl nghal bawk.

Ṭhutkhawma tarlan danin, 2024-25 hunpui vuakvetah hâlpuah leh a kaihhnawih hâl, lei leh hralh bakah, siam chhuah kaihhnawihah mi 53 man an ni a, chu'ng zinga mi 14 chu thiam loh chantir an ni. Mizoram Police leh tlawmngai pawl ṭangrualte'n hâlpuah leh a kaihhnawih an mante chu Rs 23,13,555 hû a ni.