Sikul naupangte infiamna zirtirna tur Grassroots Sports Development hawng

Sports & Youth Services (SYS) minister Lalnghinglova Hmar, Mizoram State Sports Council (MSSC) president ni bawk chuan nimin khan Ramhlun Indoor Stadium-ah naupang kum 9-14 inkarte infiamna chi hrang hrang zirtirna tur Grassroots Sports Development Programme (GSDP) a hawng.

GSDP hi MSSC leh Samagra Shiksha, Mizoram ten January 13, 2025-a thuthlung, memorandum of understanding (MoU) an ziah hnuaia mi a ni a, Mizoram hmun hrang hrangah kum 2025-26 chhunga kalpui tur a ni.

Kumin September aṭanga chhiarin thla ruk chhung GSDP kalpui a ni dawn a, naupang kum 6-14 inkarte centre 46-ah infiamna chi hrang pakua nihphung leh bulṭhut zirtir an ni dawn. Olympic 2036-a Mizoramin India ram aiawh tur infiammi a tam thei ang ber a chher chhuah theihna tura hmalak mekna nen inhne rem taka kalpui a ni ang.

Lalnghinglova Hmar chuan, infiamna tihhmasawnna tura innghahna pawimawh ber chu grassroot a nih thu sawiin, "Naupang an nih lai aṭanga uluk leh mumal taka hmathlir fel tak nei tura kaihhruaina nen kan inzirtir chuan, tun ai hian infiamna lamah kan ṭhang duang thei ang," a ti a, GSDP hlawhtlin theihna tura theihtawp chhuahtu chungah a lawm thu a sawi.

Centre-a naupangte zirtirtu tur (trainer & assistant trainer)-te chu a hun taka thil tih ngai pawimawh turin Minister chuan a chah a, "A hun taka thil kan tih chat chat loh chuan inthlahdah a awl a, naupangte discipline-in a tuar ṭhin. Khawvel pum huapa infiamnaah India ram a la hnufual laiin, India rama national level sport-ah Mizoram kan la hnufual lehzual em em hi sport kan tuipui ngaihtuahin a zahthlak a ni," a ti.

Sports Minister chuan a bulthûm aṭanga bul ṭana hmalak a ṭul thu sawiin, "GSDP aṭanga kan zirtir chhuah naupangte hi naupang dangte aia thiam bik emaw, chhinchhiah awl bik emaw an nih loh chuan kan hlawhchham tihna a ni dawn," a ti a, ṭhahnemngai takin theihtawp chhuah tur leh Olympic 2036-ah Mizo hming tiṭhatu tur chher chhuak ngei turin zirtirtute a chah a ni.

GRASSROOT SPORTS DEVELOPMENT PROGRAMME

* State level atan MSSC-ah GSDP Cell din a ni a; distict tinah Samagra Shiksha District Project Coodinator kaihhruai District Level Management Board din a ni.

* District board-ah district tina sport association-te an centre neih dan ang zelin an tel.

* GSDP hnuaia inzirtir turin Olympic sports en chunga thlan a ni.

* Kum 2025-26 atan infiamna chi 9-ah hmalak a ni dawn a, hmun hrang hrangah centre 46 ruahman niin, center tinin sorkar sikul nghenchhan an nei zel ang.

* Sikul naupang kum 9-14 inkarteah an zirlai pangngai tibuai lo tura kalpui tur a ni a, chawlhkar khatah ni thum aia tlem lo training an nei ṭhin ang.

* Sikul chawlhah uar zawkin training nei ṭhin a ni ang a, naupangte'n thla 6 chhungin minute 9,000 vel training an nei tura beisei a ni.

* Infiamna bakah Mizo nun ze mawi inzirtirna te, ruihhlo leh zûk leh hmuam ṭhat loh ziate inzirtir tel a ni ang.

* Trainer 46 leh assistant trainer 46 (center tin tan pakhat ve ve) lak a ni.