Dampa assembly constituency by-election atan inbuatsaih ṭan

Dampa Assembly Constituency-a by-election neih huna hman tur electronic voting machine leh Voter Verifiable Paper Audit Trail (VVPAT)-te chu nimin khan Mamit additional DC Carolyn LB Khiangte leh political party aiawhte enpuina hnuaiah ECIL engineer-te'n endik thawh khatna (first level checking) an nei.

Dampa bialtu MLA Lalrintluanga Sailo chu July 21, 2025-ah a thih avangin a hmun ruak luah khattu tur thlanna, by-election neih a ngai dawn a; Election Commission of India (ECI)-in by-election hun tur a la ruat ang.

Dampa by-election-a hman tur vote thlakna hmanrua EVM/VVPAT first level checking atana ruahman chu VVPAT 103, ballot unit 103 leh control unit 110 a ni a; August 19-21, 2025 chhunga enfiah tura ruahman a ni.

Dampa constituency-ah hian polling station 41 a awm a, voter 20,358 awmin, mipa 10,397 leh hmeichhia 9,961 an ni.