LADC CEM atan N Zangura la lut

Lai Autonomous District Council (LADC) chief executive member (CEM) atan nimin khan M Kawnpui bialtu MDC N Zangura chu Lawngtlai additional DC David Lalrinawma'n LADC Hall-ah rinawm thu tiamtirin a la lut.

N Zangura chuan, LADC sorkar term 11-naah hun harsa tak tak an tâwk ṭhin tih sawiin, "Hun pawimawhah ram hruaihna thawk tura ka chunga mawhphurhna tla lawmawm ka tih rualin, keimah ringawt chuan hmachhawn ngaihna a awm lo," a ti a; thawhpuiah MDC te, LADC-a thawk te, kohhran leh khawtlang hruaitute leh ram mipui a sawm.

CEM atana lak luh a nih zawhah N Zangura hian executive member tur mi pakuate hming a puang nghal a, an vaiin MNF MDC vek an ni.

N Zangura hi MNF leh BJP MDC ṭanghoin an din United Democratic Alliance (UDA)-in hruaitu atana an thlan a ni a, BJP MDC a ni. UDA hi Congress MDC neih chhunin pawn lam aṭangin a thlâwp bawk.

LADC-ah hian elected member 25 an awm a, ZPM-in MDC 11, MNF-in MDC 11, BJP-in pahnih leh Congress-in MDC pakhat an nei mek.

CEM atan lak luh tak N Zangura hma hian tuna LADC term kal mekah hian MNF, Congress leh ZPM MDC-te'n CEM nihna an lo chelh tawh a ni.

LADC EM ATANA THLANTE
1. Sanghuliana Mualchin, Lungtian Bial
2. C Rongura, Vaṭhuampui Bial
3. C Lalsawmzuala, Chandmary Bial, Lawngtlai
4. Andrew Laltlanzara, Chawngte 'P' Bial
5. Lalropuia Chinzah, Bazar Veng Bial, Lawngtlai
6. L Daniala, Bualpui Ng East Bial
7. C Hrangthianga, College Veng Bial, Lawngtlai
8. HC Lalthawmliana, Diltlang South Bial
9. H Lalmuansanga, Tuithumhnar Bial