Sikul 36-ah smart classroom hawng

School Education minister Dr Vanlalthlana chuan nimin khan sikul 36-ah smart classroom a hawng a; khawvel tlan ruala tlan ve turin an inbuatsaihnaah theihtawp chhuah a ngaih thu a sawi.

Smart classroom hi HDFC Bank Parivartan CSR hnuaia Promotion of Education project kaltlanga tih a ni a; a hawnna inkhawm hi School Education conference hall-ah buatsaih niin, Education secretary David Lalthantluanga'n a kaihruai.

Dr Vanlalthlana chuan, sorkarin zirna thuam ṭha turin hma a lak mek thu sawiin, "Tunah hian sikul 220-ah VSET hmangin smart classroom neihna tur tender kan ko mek a, khawvel vir ruala kan vir ve theihna tur hmanrua a ni. Thiamna chi hrang hrang a rawn chhuak a, chumi kan ûm ve loh chuan mi hnungah kan kal dawn. Khawvel tlan ruala tlan ve tura kan inbuatsaihnaah hian theihtawp kan chhuah a ngai a ni," a ti.

ZPM sorkar chuan project intodelh an kalpui mek thu sawiin Minister chuan, "He project-ah hian pawl 9 aṭangin mahnia kea din theih dan tur kan zirtir a, kan tum ber chu zirna-in hian hna zawng tura pass chhuak tur ringawt ni lo, mahni kea ding thei tura zirlaite lo puahchah chu a tum ber a ni a, ni tin zirnaa kal ve zirlaite chu zirna-in in mahni kein a dintir thei tur a ni tih hi kan philosphy lian a ni," a ti a; Project Intodelh chu pilot project anga kalpui a nih avangin sikul zawng zawngah kalpui theih a la nih loh thu a sawi.

Education Minister chuan, zirlaite hna sang tak tak thlirpui rualin, hna sang lem loa lang, mahse, hlawhtlinna tam tak awm thei dangte zirtir tam a ṭul thu a sawi a, "Youtube-ah hian thil ṭangkai tam tak en tur a awm a, chu chu smart classroom-ah hian tihpui theih an ni," a ti a, zirtirtute chu ngaihtuahna seng turin a chah.

Dr Vanlalthlana chuan, thiamthil nei tura zirlaite chher a pawimawh thu sawiin, "Traditional (mainstream) education kan kalpui bakah hian skills education lamah kan kal tam a ngai a, hma min lakpui theitu chu company-te an ni," a ti a; HDFC Bank hmalaknaa sikul hrang hranga smart classroom eng emaw zat din a ni tawh chu a lawm thu a sawi.

HDFC Bank, Mizoram cluster head John Varte tarlan danin, HDFC Bank hian an CSR department Parivartan kaltlangin smart classroom 36 an pe a; smart classroom-ah hian interactive touch screen bakah education software-te dah tel a ni. School Education department-a sikul a tam thei ang berah pek an tum a, sikul 42-ah an pe tawh a ni.

Hawnna inkhawmah hian Samagra Siksha state project director Lalthanzira leh HDFC Bank area head Lalhmingmawii te pawhin thu an sawi a; video conferencing katlangin smart classroom dawngtu sikul 36 hotute leh School Education department hotute an inkâwm nghal a ni.