Health Minister-in Health ATM a hawng

Health & Family Welfare minister Lalrinpuii chuan Lunglei Civil Hospital leh Lungsen Primary Health Centre (PHC)-ah Healthy Lunglei Initiative hnuaia buatsaih 'Health ATM' chu nimin khan Civil Hospital seminar hall-ah a hawng.

Health ATM hawn tak hi Mizorama a hmasa ber a ni a; test chi hrang hrang 35 tih a nih bakah, hriselna atana ei leh in fimkhur dan tur thurawnte pawh a awm. Test hrang hrang hi a thlawn veka tih theih a ni a, darkar chanve chhung vela tih zawh vek theih a nih bakah, phone-ah result dawn theih tura ruahman a ni.

Health Minister chuan, health ATM hawn a ni ta chu Mizoram tan thil chhinchhiah tlak a nih thu sawiin, mipuite'n rang taka mahni hriselna dinhmun - BP, zunthlum, taksa inphut dan (BMI), taksaa boruak thianghlim (oxygen) awm zat leh thil dang tam tak hriat nan an hman theih dawn thu a sawi a, "Inentir tura damdawi-in lian zawk pan nana sum, hun leh thâ tam tak sen ngai ṭhin chu eng emaw chen a chhâwk thei dawn," a ti.

Lalrinpuii chuan, Healthy Lunglei District Campaign bakah, Lunglei DC bultuma ngaihsak leh ngaihven ngai zualte huapa hriselna kawnga hmalakna - Project LEAP kaltlanga rualbanlote hriselna endik leh mi 700 chuang ṭanpuina hmanrua pek a ni tawh chu a lawm thu a sawi a; Health ATM atana CSR hai chhuaktu DC office leh CSR petu ABCI leh BRN te leh, khawl buntu MVS India-te chungah a lawm thu a sawi bawk.

Health ATM hawnnaah hian Lunglei High Powered Committee (HPC) vice chairman V Malsawmtluanga, Lunglei South bialtu MLA Lalramliana Papuia, Lunglei Municipal Council chairman Lalzuithanga leh councillor te, sorkar hnathawk te, ABCI, BRN leh MVS India aiawh te, kohhran leh pawl hruaitu te, damdawi-ina thawkte leh Nursing School Lungleia zirlaite an tel a ni.

Minister Lalrinpuii hian Civil Hospital, Lungleia Integrated Public Health Laboratory sak thar leh luah luh thar bakah, Trauma Centre building-a Mizoram Universal Health Care Scheme hnuaia damlo na zual enkawlna tur Intensive Care Unit (ICU) siam tharte a enfiah bawk.