Minister Sapa leh Lunglei MJA inkâwm

Minister K Sapdanga, MJA prominent journalist ni bawk chuan August 15, 2025 khan Lunglei Press Club a tlawh a, MJA, Lunglei district member-te nen an inkâwm.

Inkawmhona hi Lunglei MJA treasurer K Lalrinpuia'n a kaihruai a, K Sapdanga leh Lunglei MJA president H Lalthansanga ten thu an sawi. MJA hian ngaihhruina (souvenir) leh chawimawina thuchei an hlan a ni.

K Sapdanga chuan, journalist hna chu khawvel huap pawhin a hniam thei lo tih sawiin, "Kan rawngbawlna hi sorkar leh mipui tan entleu ngawt a theih loh. Mipui beisei erawh kan pha kher lo, chanchinbumite kan inhlawm khawmna hi min chawi nungtu leh min tihlutu a ni," a ti a; ngaihdan hrang hrang la khawm ṭhin an nih avangin an hlut thu sawiin, "A nazawngin min sel mah se, kan rawngbawlna hi a hlu a ni," a ti.

MJA President a nih laiin ṭum tam tak sorkar hotute an dàwr ṭhin tih sawiin Sapdanga chuan, "Sorkar kan hrawn tawhte an fel a, Welfare Fund-te kan nei a, mi fel tam tak fak tur an awm laia ka sawi duh chu Dr Thangtea a ni. Minister a nih laiin vawi tam MJA-in kan dawr thin a, official lamin a harsat turzia an sawi pawhin a kaltlangpui a, a zarah Welfare Fund kan nei a ni," a ti a; IPR minister hlui Dr R Lalthangliana chungah a lawm thu a sawi.

Home Minister chuan, journalism-ah a la inchiah reng thu a sawi a, "Mi dangte tana nun hi a pawimawh lai tak a ni. Lungawi hi hausakna ber a ni a, kan profession-ah hian i lungawi ang u," a ti a; eizawnna kawng hrang hrangah journalist-te chu mahni hnaa lungawi ber an nia a hriat thu a sawi.

Lunglei MJA president H Lalthansanga chuan, K Sapdanga MJA president a nih laiin MJA Welfare Fund leh thil dang tam takah hmalak a nih thu sawiin, "A hmalakna zar kan zo ta a ni. Chanchinbumi leh MJA hruaitu hlui ram hruaitu pawimawh tak kan nei hi a chhuanawm hle a ni," a ti.

Minister K Sapdanga hi Lunglei West bialtu MLA T Lalhlimpuia, Lunglei Municipal Council chairman Lalzuithanga leh vice chairman K Lalrinawma te'n an ṭawiawm a ni.