Mi 1,496 tàn theihnaah mi 1,912 táng

Mizoram chhung hmun hrang hranga jail 11-te chu mi 1,496 tàn theihna tura duan ni mah se, August 14, 2025 khan táng mi 1,912 an awm.

Táng tamna ber Central Jail, Aizawl chu mi 480 tàn theihna tura ruahman a nih laiin, mi 913 an táng a; táng tamna ber leh táng thei zat ruahman pêl nasa ber a ni. Mi 68 tàn theihna tura ruahman Saitual District Jail chu a taka hman a la nih loh avangin táng an awm lo.

Central Jail, Central Women Jail, Aizawl District Jail, Lunglei District Jail leh Champhai District Jail-ah táng awm thei zat tura bituk aia tam táng an awm a; Siaha, Kolasib, Lawngtlai, Serchhip leh Mamit district jail-ahte táng awm thei zat tura bituk aia tlem an táng thung.

Jail-a táng mek zinga 56 chu dam chhunga táng tura an chhungthu rel tawh niin, mipa vek an ni a; mi 1,241 chu an chungthu ngaihtuah mek niin, mipa 1,058 leh hmeichhia 183 an ni.

Mi 368, mipa 336 leh hmeichhia 32 chu hrehawm tak (rigorous imprisonment)-a táng tura hrem an ni a, mi 229, mipa 219 leh hmeichhia 10 chu tàn pangngai (simple imprisonment)-a táng tura hrem an ni thung. Jail-a táng mek zinga nu (hmeichhia)-te'n an hruai luh ve naupang 18 an awm bawk.