HM-in Polytechnic leh MEC a tlawh

Minister K Sapdanga chuan August 16, Inrinni khan Mizoram Polytechnic, Lunglei (MPL) leh Mizoram Engineering College, Pukpui a tlawh a; Lunglei HPC vice chairman V Malsawmtluanga, Lunglei South bialtu MLA Lalramliana Papuia, Lunglei West bialtu MLA T Lalhlimpuia, LMC chairman Lalzuithanga, UDPA secretary Lalmalsawma Pachuau leh Lunglei bawrhsap Navneet Mann ten an ṭawiawm.

Mizoram Polytechnic a tlawhnaah Minister hi Higher & Technical Education director Lalṭanpuia hoin MPL principal Lalnuntluanga leh thawktute'n an lo dawngsawng a, MPL dinhmun leh mamawhte an lo thlen.

K Sapdanga chuan, MPL chu engineering lama mi thiam tak tak leh Mizoram innghahna ṭhahnem tak chher chhuaktu, Mizorama technical institution upa ber leh pûm pawimawh tak a nih angin a hlu hle tih a sawi a, "Tluang taka zirna chhunzawm leh theih a ni hi a lawmawm. Tluang tak leh ṭha taka zirna kalpui a nih theih nan sorkarin theihtawp a chhuah," a ti.

Harsatna leh mamawh la awm building thuam ṭhat leh thawktu indaih lohna phuhrûkna turte a ṭul anga ngaihtuah zel a nih tur thu sawiin K Spdanga chuan a sawi a; thawktute chu ṭhahnemngai leh phûr taka thawk zel tura chahin duhsakna a hlan.

MPL Principal chuan, ram luah man chungchanga court thubuai vanga June 27, 2025-a MPL building eng emaw zat kalh chu sorkar hmalaknain August 12, 2025-ah hawn a nih leh tawh thu sawiin, "Class pawh pangngai taka kalpui a ni tawh a, sorkarin min ngaihsaknaah kan lawm tak zet," a ti.

Minister K Sapdanga hian Mizoram Engineering College (MEC) tur a tlawh leh a, a dinhmun a enfiah bakah, official-te nen zirna ṭan thei tura hma lakna leh hmabak awmte an sawiho.

K Sapdanga chuan, MEC chu engineering zirna tur leh Mizoram hmasawnna atana pawimawh tak tur a nih thu a sawi a; Chief Minister duh angin 2026-27 academic session-ah zirna ṭan hman a nih theih nan ṭha tak leh chak taka hna thawk turin department hotute leh mawhphurhna neitute a chah a, "Mamawh in neihte sorkarah rawn thlen zung zung rawh u," a ti.

HTE Director-in a sawi danin, MEC hmunhma tur hi Rashtriya Uchchatar Shiksha Abhiyan (RUSA) hnuaia sum hmuh vbc. 26 hmangin April 22, 2016-ah khawih ṭan a ni a, November 16, 2018-ah building-te sak zawh niin, Prime Minister-in February 3, 2019 khan râl aṭangin a hawng.

In hrang hrangte kum 2018-ah sak zawh ni tawh mah se, tun thlengin zirna kalpui theih a la ni lo. In sak tawh thawm ṭhat ngaite leh a panna kawng siamna leh mamawh hrang hrang atan Mizoram sorkarin cheng vbc. 25.41 a dah a, hmalak leh mek a ni a; kum 2026-27 session-a zirna ṭan tum a ni.