KHAWTHLIR

KṬP-in thisen pe

KṬP, Zuangtui Pastor Bial chuan August 16, Inrinni khan thisen pek an huaihawt a, Synod Hospital tan thisen unit 47 an pe a, petute mipa 44 leh hmeichhia pathum an ni.

Missionary retreat

Evangelical Free Church of India (EFCI) chuan August 13, 2025 aṭanga nimin thleng khan Hmarkhawlien, Cachar Presbytery, Assam-ah Missionary Retreat-cum-Spiritual Conference leh Central Ramthar Board ṭhutkhawm vawi 44-na an hmang.

Heroin man

Lunglei Police hnuaia District Special Branch chuan August 16, Inrinni zan dar 10 vel khan Pukpui daiah heroin gram 10 an man. Heroin kaihhnawihah hian Vanlalremi (48) d/o Lianzuala leh a unaupa Lalṭhakima (35) s/o Lianzuala, Lunglei Chanmari ve vete an ni a, thubuai siamsak an ni.

H&B Water Park

Chief minister Lalduhoma chuan August 15, 2025 khan Sakawrtuichhuna Liando Resorts-ah Hminga & Bawli (H&B) Water Park a hawng a, water park chu mipuiin an hman ṭangkai a beisei thu a sawi. H&B Water Park hi R Tlanghmingthanga, Venghlui te chhungkaw enkawl a ni.

CADS ruihhlo man

CYMA hnuaia Central Anti Drug Squad chuan August 9-15, 2025 chhung khan heroin (no.4) hawng 43 leh Tictac bûr 33 an man a; ganja kg. 2.031, tramadol báwm 7 sarih, alphazolam báwm kua, NAP 10 báwm khat, tumispas báwm thum, pregabalin báwm thum, codeine 169 leh sap zu ûm 16 an man bawk. Ruihhlo kaihhnawihah hian mi 56 an man a, chu'ng zinga paruk chu Excise & Narcotics department hnenah an hlan a ni.

Tlan phal lo

Mamit SP Manny Bhushan Singh chuan thuchhuah siamin, NH-44A (108) Darlak-Tuidam via Sabual kawng siam mekah chak leh ṭha zawka hna thawh a nih theih nan August 18-31, 2025 chhung ni tin zing dar 7:30 aṭanga tlai dar 6 thleng he kawngah hian lirthei ke pali neite tlân phal a nih loh thu a tarlang.