Thingtlang khaw lian deuhah village revenue official dah tum

Land Revenue & Settlement minister B Lalchhanzova, Food, Civil Supplies & Consumer Affairs department enkawltu ni bawk kaihhruaiin tun hnai khan Serchhip DC meeting hall-ah LRS secretary Vanlalmawia leh FCSCA secretary Teresy Vanlalhruaii ten thuthar thehdarhtute an kâwm a; online-a ration card dilna siam tum a nih thu leh thingtlang khaw lian deuhah village revenue official (VRO) dah tum a nih thu an sawi.

Vanlalmawia chuan, Mizorama Revenue department inrêlbâwl dan chu a bulthûm aṭanga a fel loh thu leh hmasawn turin insiamremna tur leh tihdanglam tur a tam thu a sawi a, "Hma lam pan turin a bulṭhutah kan lêt a ngai a, mipui hnaiha Revenue hotute an awm theih nan thingtlang khaw lian deuhah village revenue official dah tum niin, sub-division-ah assistant commissioner ruat kan tum. A bul ṭan nan Thenzawl leh Vairengteah kan dah phawt ang," a ti.

District Bawrhsapte chu revenue thuneitu sang an nih avangin an thuneihna tihpun an tum thu sawiin Vanlalmawia chuan, "Mizoram Revenue Amendment Act chu Assembly session-a pass turin thehluh a ni. Revenue court system mumal awm lo siamṭhat tumin hma kan la a, Revenue Court Manual siam mek a ni. Ram buai chungchangah DC leh ADC te chu zualkona hmasa (first appellate) atan ruat kan tum," a ti. Chhiah (tax) chu e-Ram hmangin online-a pek theih a nih thu te, digital land record an kalpui mekah GIS Mapping tih a ni a, online-in mahni ram chin chiang taka en theih a nih thuai tur thute a sawi bawk.

Supply secretary Teresy Vanlalhruaii chuan, mipuiin ni tin mamawh a hun tak leh dik taka an dawn theih nan hma an lak thu a sawi a, "Retailer-te hnenah bûk dik takin buhfai leh a dangte an pe chhuak ngei tih hriat nan Supply kudam tinah digital weighing scale dah a ni dawn a, August thla chhung hian khawl a thlen kim beisei a ni. Sorkar laipui duh dan angin beneficiary zawng zawngte e-KYC tih fel vek tur a ni," a ti a, khaw tina VC-te puihna an mamawh thu a sawi.

Teresy Vanlalhruaii chuan, September 30, 2025 thleng chauh hun an neih tawh avang leh e-KYC tifel lote'n ration an dawn theih dawn loh avangin ṭan la turin a ngen. Online-a ration card dilna siam an tum thu te, mipuiin thla tira ration an dawn theihna tura ṭan an lak dan te, Supply Minister hmalakna avanga kawng chhe karah pawh buhfai harsat thu hriat tur a awm loh thute a sawi a, "Ration chungchang a ni emaw, department kaihhnawih engpawh harsatna emaw, zawh duh emaw nei chuan toll free number 1976-ah englai pawha biak pawh theih kan ni," a ti.