MUHCS hi mipuite'n buaina awm loin kan chhawr theih thuai ka beisei - K Sapdanga

Minister K Sapdanga chuan August 16, Inrinni khan Lungleia damdawi-in pahnih - Christian Hospital, Serkawn leh John Williams Hospital a tlawh a; Mizoram Universal Healthcare Scheme (MUHCS) chu mipuite'n buaina awm loa an chhawr tlân theih thuai a beisei thu a sawi.

Christian Hospital a tlawhnaah K Sapdanga hi Baptist Church of Mizoram (BCM) hnuaia Medical & Health Department director Dr B Laldinliana leh damdawi-ina thawktute'n an lo dawngsawng a, an hmalaknate an lo hrilhfiah a, thawktute nen an inkâwm bawk.

Home Minister chuan, Mizoram sorkarin mipuite'n dam loh nikhuaa inenkawlna ṭha an dawn theih nan MUHCS a duang tih sawiin, "MUHCS-a siam rem leh ennawn ngaite lo zir chiang tura review committee dinah chairman-a ruat ka nih angin damdawi-in hi ka rawn tlawh a ni," a ti.

Christian Hospital chu MUHCS timawitu leh tiphuisuitu hmasa ber, phûr tak leh inhawng taka sorkar thawhpuitu a ni a, an ngaihlu tih sawiin K Sapdanga chuan, "MUHCS hi Mizoram mipuite'n buaina awm loa kan chhawr tlan theih thuai ka beisei," a ti a; BCM kohhran leh damdawi-ina thawktute chu MUHCS an pawm avangin lawmthu a hrilh.

Christian Hospital hotute chuan, MUHCS hnuaia an damdawi-inin bill an neihte chu Mizoram sorkarin rei rial loin chawlhkar tin a pek zung zung thu leh pawisa an dawn ṭhat thu an sawi.

Christian Hospital hian May 21, 2025-ah MUHCS an hmang ṭan a, damlo 786 enkawlna senso cheng nuai 151.75 chu Mizoram sorkar aṭangin an hmu lêt tawh. Chawlhkar tin chawh rualin cheng nuai 13.2 vel hmu ang an ni.

UDPA department kaltlanga Christian Hospital-a damlo awmpuitute riahna tur (patient attendants shelter) mipa panga leh hmeichhe panga thlen theihna tur sa tura ruahman chu buaipui mek a nih thu leh, fûr zawh veleh hna ṭan theih beisei a nih thu tarlan a ni.

John Williams Hospital a tlawhnaah hian minister K Sapdanga hi medical superintendent Dr K Lalsanga hoin damdawi-ina thawktute'n an lo dawngsawng a; damdawi-in an lo fanpui bakah, an hmalaknate an hrilhfiah.

K Sapdanga chuan, damdawi-in enkawl chu rawngbawlna pawimawh a nih thu sawiin, "Sorkarin hmalakna hrang hrang a neihah kohhran leh mimal damdawi-inte'n sorkar an thlawpna leh thawhpuina a ṭha ṭhin," a ti a; John Williams Hospital-a thawkte chu ṭha taka sorkar thawhpui zel tur leh mipui hrisel nan theihtawp chhuah zel turin a chah.