Sipai chawimawina sang ber dawttu dawng turin Capt. Lalrinawma thlang

India rama sipai chawimawina sang ber dawttu Kirti Chakra chu dawng turin Captain Lalrinawma Sailo (26), Chanmari, Aizawl thlan a ni.

Capt. Lalrinawma Sailo hi 4 Para (Special Forces)-a awm mek a ni a, operation an neihnaah a huaisen leh chet ṭhat avangin Kirti Chakra dawng tura thlan a ni. Kirti Chakra dawng tur hian mi pali thlan an ni.

Sipai huaisen leh thawk ṭha chawimawina dawng tur hi President Droupadi Murmu chuan August 14, Ningani khan a puang a, chawimawina sang ber Ashok Chakra dawng tur an awm lo. Sipai huaisen chawimawina hrang hrang dawng tura thlante hnenah President-in November 2025 khian Rastrapati Bhavan-ah a hlan ang.

Kirti Chakra hi ram dang nena indopui lai ni lo, operation (hmelmate beih) laia sipai huaisente chawimawina sang ber dawttu a ni.

Mizo zingah Kirti Chakra dawng pakhat chiah a la awm a, Khawvel Indopui-II lai vel khan Chalhnuna (L), Assam Rifles chuan a lo dawng tawh a ni.