Governor hoin Mizoram zirna sawiho; Sikul 4,453-ah zirlai 3,00,000 vel an awm

Governor Gen. Dr Vijay Kumar Singh chuan nimin khan Raj Bhavan-ah School Education department hotute a kâwm a, zirlaite thinlungah thiamna tak tak tuh a ṭul thu a sawi. Mizoramah sikul 4,453 awmin, zirlai 3,00,000 vel an awm mek thu tarlan a ni.

Inkawmnaah School Education department hotute tarlan danin, Mizoramah sorkar sikul 2,573, deficit school 26, aided school 340 leh private school 1,479 bakah PM-SHRI school 35 a awm a; chu'ng sikulahte chuan zirlai naupang 3,00,000 vel an awm mek.

Larsap chuan, zirlaite chu ram inghahna la ni tur an nih thu sawiin, zirna ṭha pek leh enkawlnaah theihtawp chhuah tlan a ṭul thu a sawi a, "Zirlaite kal zelna tura pui turin an thinlungah thiamna tak tak tuh a ṭul a, sikul ṭha leh pan awlsam chhawp chhuahsak a ṭul," a ti.

Gen. VK Singh chuan, "Sorkar scheme pawimawh tak takte leh National Education Policy 2020-te ṭha taka kalpui a ṭul," a ti a; sorkar laipuiin zirna tihhmasawn nan sum leh pai tam tak sêngin Mizoramah Eklavya Model Residencial School, Kendriya Vidyalaya, Sainik School leh Jawahar Navodaya Vidyalaya te a din thu a sawi bawk.

School Education secretary David Lalthantluanga'n department chanchin, dinhmun leh hmalaknate a sawifiah a, zirna tihhmasawn leh zirtirtu indaih lohna phuhrûk kawngah sorkarin theihtawp a chhuah mek thu a sawi.

School Education director Angela Zothanpuii'n PM Poshan - Mid Day Meal kalpui dan a sawifiah a; Samagra Shiksha state project director C Lalthanzira'n Samagra Shiksha hmalaknate a sawifiah bawk.

Inkawmhonaah hian zirna lama Mizorama central scheme hrang hrang kalpui dan te, education curriculum duan leh bawhzui dan te, NEP kalpui dan te, sorkar laipuiin Mizorama sikul a dinte ṭangkai zawka mipuiin an chhawr theih dan turte leh zirna tihhmasawnna atana pawimawh dangte sawiho a ni.