Aizawl Treasury Bazara inzawrh tumte bungrua senghawi turin AMC-in a hriattir
Aizawl Municipal Corporation (AMC) chuan nimin khan thupek chhuahin, Aizawla Treasury Bazara inzawrh tumte chu vawiin tlai dar 3 rîk hmaa an bungruate senghawi vek turin an hriattir.
AMC chuan, Treasury Bazar chu March 17, 2025 khan khâr a nih thu tarlangin, "Helai hmuna dan kalha thil zawrhna hmun buatsaih zawng zawngte chu August 14, 2025 tlai dar 3 rik hmaa inseng vek tur leh an bungruate senghawi vek tura hriattir an ni. Hun tiam chhunga insenghawi lote chungah dan angin hmalak a ni ang," an ti.
Mizoram Legislative Assembly House nghêng maia awm bazar awm chu a him lo nia ngaiin khâr a nih tawh thu tarlangin AMC chuan, "Mipuite tana kalna leh chawlh hahdamna hmun nuam tak siam turin ruahmanna siam mek a ni," an ti a; project mumal tak siamin, hna thawh ṭanna tur work order an buaipui mek tih an tarlang.
AMC chuan, Treasury Bazara ṭhu ṭhinte chu AMC Multi-Complex, Tuikual South-ah ṭhutna hmun ṭha tak pek vek an nih thu a tarlang a, "Sawn thlak an nih hian duh leh mamawh hrang hrang an nei a, an harsatna leh mamawhte AMC chuan a tihhlawhtlinsak ṭhin a, cheng nuai 13 chuang sen a ni tawh," an ti.
AMC tarlan danin, nimin zing khan mi ṭhenkhatin Treasury Bazar hmun hluiah inzawrhna leh ṭhutna tur an siam a ni a, thil zuar pawh an awm hman. Hei hi AMC-in an hriat veleh a hmunah an enfiah nghal a, mi pariat velin ṭhutna tur an siam mek a, mi pakhatin thil a lo zuar hman tawh. Dan loa hma late hian an hming an sawi duh lo a, tute nge an nih hriat a ni lo.
AMC thuneitute chuan thil zawrhna tur siamtute insaseng nghal tura hriattirna (order) a chhuah nghal a; dan bawhchhia a hma late chu August 14 tlai dar 3 hmaa insaseng a, an bungruate pawh senghawi vek turin an hriattir a ni.
Aizawla chengte hma ngaia AMC-in hma a lakna kawng hrang hrangah mipuiin an thlawp ṭha hlea an hriat thu tarlangin AMC chuan, "Hetih mek laia dan pawisalo ṭhenkhatte'n dan kalha hma an la hi kan dem tak tak zet a, a ṭul angin hma kan la zel dawn. Ei tur thianghlim leh hrisel kan lei theihna tura kan hmalakna hi thlawp a, AMC Market-a thil zuarte dawr turin mipuite kan sáwm a ni," an ti.