Supply Minister-in kawng siam a tlawh

Food, Civil Supplies and Consumer Affairs (FCSCA) minister B Lalchhanzova chuan nimin khan NH-06 Kawnpui-Sairang inkar chhe lai thawm ṭhat mek a a tlawh a; kawng laka lirthei tangkhang enkawltute hnenah ei leh in tur eng emaw zat a pe.

Supply Minister hian Thlanvawng kâwna box culvert dah mek te, Buichali pêng bula kawng chhe zual lai te, Mualkhang Nazareth Veng te, Khamrang pêng aṭanga km. 2 vela kawng chhe lai te, Zatawna Petrol Pump bula kawng siam lai te, Mega Food Park bul vela kawng chhe laite a en a ni.

B Lalchhanzova chuan, kawng chhe zual laite leh thawm ṭhat hna thawh mek a enfiah a; hna thawktute'n theihtawp an chhuah tih a hmuh thu sawiin, lawmawm a tih thu leh fakawm a tih thu a sawi. Sairang, Mualkhang, Khamrang, Mualvum leh Bualpui branch YMA-te hnenah sorkarin hnatlang a puihna sum eng emaw zat a hlan a; hna thawktute'n harsat an sawite a ngaithla bawk.

Kawng chhia leh kawng thawm ṭhat mek vanga lirthei tangkhang mek enkawltute hnenah Mizoram sorkarin ei leh in tur (ration package - buhfai, dailuah, alu, tél leh purunsen) a siam a, Kolasib Sub-Hqrs YMA kaltlanga sem ṭhin a ni. Minister hian Kawnpuia tangkhang mi eng emaw zat hnenah ration package a hlan a; nimina ration package pek zawng zawng chu mi 492 an ni.

B Lalchhanzova chuan, Mizo tlawmngaihna YMA kaltlanga lang ṭhin chu lawmawm a tih thu sawiin, sorkar lam nen theihtawpa ṭanrual zel a pawimawh thu a sawi.

FCSCA Minister hian lirthei tangkhang enkawltute kâwmin, chhel tak leh dawhthei taka awm turin a ngen a; Mizoram sorkar leh NHIDCL-in kawng thawm ṭhat dan tur an ruahman angin chak taka hna thawh a nih thu leh, tangkhangte chu an chhuah thuai theih a beisei thu a sawi bawk.