Aizawlah NE NSS Festival ṭan a ni

Nimin khan Art & Culture Auditorium, Berawtlang, Aizawlah North East National Service Scheme (NSS) Festival ṭan a ni a, Sports & Youth Services minister Lalnghinglova Hmar-in a hawng.

NE NSS Festival hi Regional Directorate of NSS leh Mizoram SYS department hnuaia State NSS Cell buatsaih a ni a, August 5-9, 2025 chhung neih tur a ni. Hmarchhak state - Mizoram, Assam, Manipur, Nagaland, Tripura, Sikkim leh Meghalaya aṭangin NSS volunteer 250 vel leh programme officer-te telin, a hmunah an riak a ni.

Festival-ah hian NSS kalhmang leh thil tumte leh NSS hmalakna kal zel atana ṭha tur te, leilung leh a chhunga awmte humhalh, a thlawna thisen pek, kutkawih eizawnna chungchangte leh thil dangte zirho a ni dawn. Hnam làm leh zai entir, walkathon, social work leh sightseeing hunte hman a ni bawk ang.

Lalnghinglova Hmar chuan, NE NSS Festival 2025 Mizoramin a thleng chu a lawm thu sawiin, "NSS hi ṭhalaite hnena zirlaibu páwn lama thil pawimawh zirtirtu, khawtlanga an mawhphurhna hriattirtu a ni. Mizoramah pawh NSS hnathawh rah awmze nei leh ṭangkai tak tak tam tak a awm a, thing phun leh faina lama an thawh hlâwk hle," a ti a; Covid-19 len laiin NSS volunteer-te ṭangkai thu a sawi.

Hlim taka an kût hmang tura duhsakna hlanin Lalnghinglova chuan, hnam zia leh ṭobulte inzir tawnna atan leh ṭhian ṭha siamna atana hmang turin state hrang hrang aṭanga telte a chah a; ramin a mamawhnaah NSS kaltlanga chháng zel tur leh khawtlang khaichhuahna atana an theihnate hmang zel turin a fuih bawk.

NE NSS Festival hawnnaah hian NSS (NER) regional director D Carthigueane chuan Festival hman dan tur tlangpui a tarlang a; NSS chu zirlaite inhmanna lian tham berte zinga mi a nih thu sawiin, "NSS hian volunteer nuai 40 vel an nei mek a, tun aṭanga rei lo têah volunteer nuai 65 an tling thei tura ngaih a ni," a ti.

NSS (NER) youth officer NC Deori pawhin thu sawiin, NE NSS Festival chu kum 2014-ah buatsaih ṭan a nih thu a sawi a, "Kum 2047-a India ram developed country-a hlan kai a nih theihna atana hmalakna Viksit Bharat zûlzuia inhmakhua nan he kût hi a pawimawh," a ti a; Festival-a telte chu hlâwkna chhar chhuak ngei turin a chah.

Mizoram state NSS officer Dr Lalrinmawia'n Mizorama NSS hmalakna te, hlawhtlinnate leh NE NSS Festival thil tumte a sawi a; Mizoramah chuan kum 1972 khan Pachhunga University College-ah NSS unit din a nih thu leh tunah chuan zirna-in 103-ah NSS unit din tawh a nih thu a sawi bawk.

Dr Lalrinmawia tarlan danin, NSS hi Mizoramah pawl anga a thlawna thisen pe tamte zinga mi a ni a, financial year 2024-25 chhung khan NSS-in blood donation camp 82 buatsaihin, thisen unit 6,000 chuang an pe a ni. Thing phun, khawpui then fai leh awareness campaign hrang hrang an huaihawt ṭhin a, khawtlang tana thil ṭangkai - waiting shed, public bench, vantlang zun-in leh a dangte 60 chuang sak a ni.