Delhi-a Mara House sak mek; May 2026-ah hawn hman tum

Mara Autonomous District Council (MADC) chief executive member (CEM) M Laikaw chuan, New Delhi-a Mara House sak mek chu May 2026-ah hawn hman tum a nih thu a sawi.

M Laikaw hian MADC Social Welfare department-in nimina Siahaa upate hnenah dailuah an semna inkhawmah thu a sawi a, "New Delhi-ah Mara House kan sa mek a, May 2026-ah hawn a ni dawn. Lungleiah Mara House kan nei tawh a, Aizawlah Boy's & Girl Hostel kan nei a, Gauhati-ah ram kan lei tawh bawk. Kei leh ka thawhpui kaihhruai BJP sorkarah hian achievement ropui tak kan nei nual tawh a ni," a ti.

MADC Social Welfare department chu tê mah se, theihtawp chhuahin hma an la tih sawiin M Laikaw chuan, "MTP tan silpoaline, no, ketli leh a dangte sem a ni tawh a, vawiinah dailuah kan sem a, a ṭul chuan vitamin leh a dangte pawh kan sem zel ang. Upa ho hi MADC chuan kan ngai pawimawh a, an hamṭhatna tur kan ngaihtuah zel dawn," a ti a; MDC ruling leh opposition bial an thliar loh thu a sawi.