Samthang zîkhlûm qtl. 1,000 vel ṭawih chhia

Samtlang khua chuan kum dang ang bawkin kuminah zîkhlûm ṭhahnem tak an thar a, quintal 1,500 - 2,000 inkar vel an hralh tawh laiin, an hralh ṭhat theih loh avangin qtl. 1,000 vel a ṭawih chhe tawh. An ngen angin Aizawla veng ṭhenkhatin an veng chhungah an zawrhsak a ni.

Samthang aṭanga thu dawn danin, Samthang khua hian kuminah zîkhlûm ṭiak nuai 14 vel phunin, qtl. 6,500 vel thar an inbeisei a, a thar vanglai a ni mek. Nimin thleng khan qtl. 1,500 - 2,000 vel an hralh tawh a, chu chu ip 3,000 - 4,000 vel a ni.

Zîkhlûm eng emaw zat hralh tawh mah se, hralhna tur an hriat loh avangin a zatve pawh an la hralh lo a; an hralh theih loh avang hian tam tak a ṭawih chhia a; ṭawih chhe zat hi qtl. 1,000 velah an ngai. Ruahtui leh thil dang vanga chhia qtl. 500-1000 vel a awm bawk.

Hralh theih loh vanga Samthanga zîkhlûm thartute mangang chuan Aizawla YMA branch ṭhenkhatte dâwrin, an huam chhungah zawrhsak turin an ngen a; branch ṭhenkhatin an zuar tawh a, an la zuar mek zel.

Samthang zîkhlûm zawrhsaktu YMA-te chu Bethlehem Veng, Bethlehem Vengthlang, Chaltlang, ITI Veng, Luangmual, Mission Veng, Republic Veng, Tuikual, Zonuam leh Zotlang te an ni a; zîk­hlûm zawrhsaktute leh leisaktute chungah an lawm tak zet thu an sawi.

Zîkhlûm an hralh theih loh chhan zawhna chhángin, "Phai zîkhlûm a tam a, a hun a inrual ṭhup bawk si a, demand a tlem ni berin a lang. Kan beisei zatve zet chawlhkar tin kan hralh pha lo ziah a ni," an ti.