Forensic Lab-in kum ruk chhungin thubuai 6,677-ah thil 74,975 endik

Home minister K Sapdanga hoin nimin khan Directorate of Forensic Science Laboratory (FSL) dinhmun thlirhona, ‘Review Meeting of Forensic Science Laboratory’ buatsaih a ni a; kum ruk chhungin FSL-in thubuai 6,677 kaihhnawihah thil chi hrang hrang 74,975 an endik tih tarlan a ni.

K Sapdanga chuan, FSL chu mipui leh ram in­ngahna, thubuai tam tak chin­felna leh pawi­khawih­na chi hrang hrang chhui chhuahnaa in­nghah­na bulpui pakhat a nih thu a sawi a, "Mizoram FSL pawh hman­­raw ṭha zawk nena thuam a pawimawh... Home depart­ment hnuaia pêng hrang hrang­te inkarah thawh­ho­na ṭha a awm zel ka bei­sei," a ti.

Sorkar thuchhuah tarlan danin, Mizoram FSL hian kum 2019-20 aṭanga 2024-25 thleng khan thubuai hrang hrang 6,677-ah thubuai kaihhnawih thil 74,975 an endik a ni.

FSL mithiamte chuan pawikhawihna hmun 432 kal chilhin an zir chiang tawh a, an thil endik leh zir chian kaihhnawihah ṭum 2,142 court-ah an inlan tawh. Thubuai hrang hrang kaihhnawihah kum 6 chhungin kut zia (fingerprint) 41,078 an la tawh bawk.