CM-in Civil Hospital, Aizawla Trauma Care Facility a hawng

Chief minister Lalduhoma chuan nimin khan Civil Hospital, Aizawl (CHA) Trauma Care Facility a hawng. CM chuan, doctor-te mamawh hmunhma leh hmanruate chhawpsak a, damlote'n phai an panna ṭhin tam tak neih ve an tum thu a sawi.

CM Lalduhoma chuan, CHA Trauma Care Facility hawn a ni ta chu hmsawnna a nih thu sawiin, "CHA-ah hian lung zaina te, kal (kidney) thlak theihna te, khawl hmanga nau paitir theihna In Vitro Fertilization tihnate dah kan rilrûk. Kan doctor-te an thiam em em a, an mamawh facility kan pe lo ni mai zawkin kan hria. An mamawh hmunhma leh hmanruate chhawpsak a, phai lam kan panna ṭhin tam tak hi neih ve kan tum a ni," a ti.

PMJVK aṭangin CHA block A & B sak ṭhatna tur cheng vbc 88.33 ruahman a nih thu sawiin Lalduhoma chuan, "Hna ṭan thuai a ni ang. Trauma hi tihchangtlun zel a ni dawn," a ti a; Trauma Centre sira hmuhma zim tê, Health department ta ni si lo chu sawiho ṭhaa a hriat thu a sawi.

Health minister Lalrinpuii pawhin thu sawiin, CM-in Health department tana hma a lak nasat thu leh an dil apiang a la pek deuh zel thu a sawi a, "CM-in mipui hriselna a ngaih pawimawhzia a lang a, sorkar damdawi-in tihhmasawn hi mirethei zawkte tan bawk a hlut avangin mirethei zawkte hmakhua a ngaihzia a tichiang hle," a ti.

Trauma Centre hawnna inkhawm hi Health secretary H Lalengmawia'n a kaihruai a, Health & Medical Education director Dr SR Ngurchamliana'n Trauma Care Facility Centre din tura hmalak dan a sawi.

CHA Trauma Care Facility-ah hian reception leh triaging area, treatment area, observation room, imaging room (xray/CTscan), minor operation theatre/resucsitation room leh doctor/staff room te a awm a ni.

HAWNNAA TARLAN ṬHENKHAT

• Sorkar laipuiin national highway km. 100 dan zelah trauma centre dah tur, tih dan a nei.

• Kawngpui (highway)-a chetsualna tâwkte darkar khat chhungin trauma centre thlenpui hman tur a ni.

• Mizoramah damdawi-in pasarihah trauma care facility din a ni tawh a, Lunglei leh Lawngtlai tih lohah chuan hman a ni tawh.

• CHA bik hi a sakna tur ram chungchangah buaina a awm avang leh Covid-19 lêng vangin sak mai lohin a awm a, February 2022-ah sak ṭan a ni a; a sak nan sorkar laipui aṭanga hmuh cheng nuai 121.50 leh Mizoram sorkar sum nuai 450 hman a ni.