Mizoram sorkar college 23 zinga 4-in NAAC grade A leh a chung lam an nei

Mizoramah Higher & Technical Education (HTE) department enkawl, University Grants Commission (UGC) pawm college 23 an awm mek a, chung zinga college pali chuan NAAC grade A leh a chung lam an nei. Lunglei Pukpuia Mizoram Engineering College-ah academic session 2026-27 aṭangin zirna ṭan tum a ni.

Nimin khan chief minister Lalduhoma kaihhruaiin HTE department hnathawhte thlirho a ni a; DPAR minister K Sapdanga leh HTE minister Dr Vanlalthlana bakah, department official-te an tel.

Ṭhutkhawma tarlan danin, Mizoram sorkar college 23 zingah NAAC A+ grade hmu tawh college pakhat a awm a; A grade hmu college pathum a awm. Grade B++ grade hmu college pahnih, B+ grade hmu pahnih, B grade hmu 10 leh C grade hmu college pahnih a awm bawk.

Mizoram Engineer College, Pukpuiah academic session 2026-27 aṭanga zirna bul ṭan tum niin, hmalak mek a ni a; Civil Engineering, Mechanical Engineering, Electrical Engineering leh Computer Science & Engineering course hawn tum niin, seat 30 ṭheuha bul ṭan tum a ni. A hmunhma thawm ṭhat nan Mizoram sorkarin tun hnaiah cheng nuai 2,541.19 a pe.

National Institute of Technology (NIT), Mizoram campus atan Lengpui ramah kum 2009 khan bul ṭan a ni a, forest clearance neih loh vangin kum 2017-ah hna tihtawp a ni. Kum 2021-ah forest clearance dil a ni a, kum 2023 khan Mizoram sorkar chu cheng vbc 20 chuang chawi tura tih a ni. CM Lalduhoma'n a dil hnuah pawisa chawi tur chu nuai 140-ah tihhniam a ni a, pawisa chawi tur chu pek (deposit) tawh niin, hna chhunzawm thuai beisei a ni.

New Education Policy, 2020 phût angin Mizoram State University (MSU) din tura hmalak mek a ni a, Aizawla college pahnih/pathum suihfin tum niin, school pali vel hawnga bul ṭan tum a ni. MSU hmunpui atan tuna Geology & Mining ram, Luangmual ruahman a ni a, hmunhma thar tihfel a nih hma chu Govt. Aizawl College building, Sikulpuikawn chu Administrative Building atana lo hman lailawk theih rin a ni.

Mizoram Polytechnic, Lungleiin harsatna a tawh mek chungchang sawiho a ni a; Supreme Court-in a ngaih-tuah dawn hnai a, chuta tan chuan inbuatsaih mek a ni.