KHAWTHLIR

MBSE pisa thar

Education minister Dr Vanlalthlana chuan nimin khan Mizoram Board of School Education building sak thar a hawng. MBSE building thar hi Congress sorkar laia scheme - NEDP aṭanga hmuh cheng nuai 1,000 hmanga sak a ni a, February 18, 2021-ah sak ṭan niin, December 14, 2024-ah zawh a ni. Chhawng sariha sang a ni a, a satute'n April 22, 2025 khan MBSE hnenah an hlan.

Document lem hmang lo turin ngen

Mizo Hindi Zirlai Pawl (MHZP) chuan thuchhuah siamin, Hindi zirtirtu tur lak leh hmasak berah dik tak leh rim taka zir chhuakte'n an chanvo an hmuh ngei theih nan hma an la dawn tih an tarlang a; dik lo taka document lem hmanga dil tum lo turin mi tin an ngen. MHZP hian July 16, Nilaini khan Samagra Shiksha State Project Director an hmu a, Samagra Shiksha hnuaia CSS aṭanga Hindi zirtirtu 16 lak tum, advertisment tih tura approval awm tawh, lak loha awm reng chungchang an zawtfiah.

Heritage Centre sak dan sawiho

Serchhip district bawrhsap Paul L Khuma hoin nimin khan Serchhipa Kawlri tlanga Heritage Centre sak chungchangah sorkar hotu te, Heritage Society leh contractor-te an ṭhukhawm. Bawrhsap chuan, Heritage Centre sak dan tur hun bituk anga theihtawp chhuah turin contractor-te a chah a, "Tuna in hnathawh mek dan aia chaka in thawh a ṭul," a ti.

ZPM Zonu-in CM an lawmpui

ZPM Zonu chuan chief minister Lalduhoma chu Karunya Institute of Technology & Sciences (Deemed to be University)-in honorary doctorate degree (Doctor of Letters) an hlan avangin nimin khan a pisaah lawmpuina an hlan. Zonu chuan, Chief Minister chu an chhuan tak zet thu leh Mizoram tana a hmalaknaah an thlawp sel dawn thu an tarlang. CM hnenah hian ZPM Zonu president R Lalawmpuii'n lawmpuina thuchei a hlan a ni.