Lunglei-in fai inelnaah lawmman a dawng

Ministry of Housing and Urban Affairs (MoHUA) buatsaiha India rama khawpui fai inelna, Swachh Survekshan Award 2024-2025 chu nimin khan Vigyan Bhawan, New Delhi-ah sem a ni a, Lunglei chuan state award pakhat, Mizoram khawpuite zinga faina kawnga hma hun êng ber lawmman 'Promising Swachh Shehar Award' a dawng.

Lunglei-in Promising Swachh Shehar Award a dawn hi UDPA minister K Sapdanga'n Union Housing & Urban Affairs minister Manohar Lal hnen aṭangin a dawng a; Lunglei Municipal Council (LMC) vice chairman K Lalrinawma, LMC executive councillor Lalhruaitluangi Sailo, UDPA secretary Lalmalsawma Pachuau leh director Jacob Lalawmpuia ten an ṭawiawm.

Swachh Survekshan Award hi Swachh Bharat Mission - Urban (SBM-U) hnuaia inelna a ni a, India rama khawpui zawng zawng telin, tehfung hrang hrang hmangin an inel a ni. Tun ṭum hi Swachh Survekshan Award vawi 9-na niin, khawpui len dan azirin inelna huang hrang hrang siam a ni a, award chi hrang 78 sem a ni.

Kum 2016-a Swachh Survekshan Award sem ṭan a nih aṭangin Lunglei khawpui chuan award paruk a dawng tawh a; kum 2019-ah Best City in Innovation and Best Practices in Northeast Zone, kum 2021-ah Best City in Citizen Feedback in North East Zone (mi 50,000 - 1,00,000 inkar), kum 2022-ah Clean City in North East Zone (mi 50,000 - 1,00,000 inkar), kum 2023-ah Clean City in North East Zone (mi 50,000 - 1,00,000 inkar) leh Clean City within Mizoram (mi 1,00,000 hnuai lam) te a lo dawng tawh a ni.