Laboratory permanent registration zirho

National Health Mission, Mizoram chuan nimin khan Hospital & Medical Education conference hall-ah Clinical Establishment (Registration & Regulation) Act hnuaiah Aizawl district-a sorkar leh mimal laboratory-te tan permanent registration chungchang inzirtirna an buatsaih.

Zirhona hi Clinical Establishment (Registration & Regulation) Act-a state nodal officer Dr Ruth Lalmuanpuii'n a kaihruai a; Mizoram sorkarin October 12, 2025 aṭangin sorkar leh mimal laboratory zawng zawng chu permanent registration ti vek tura a tih thu leh, permanent registration chu laboratory-te tihchangtlunna leh damlo inenkawlnaah hmasawnna thlentu tur a nih thu a sawi.

Dr Ruth Lalmuanpuii chuan, dan loa laboratory hawngte leh Clinical Establishment Act bawhchhia te, standard pha lo laboratory-te chu dan anga hrem a nih theih thu a sawi a; laboratory neitu/enkawltu training-a telte chu an thil zirte ngai pawimawha hmang ṭangkai turin a chah.

Zirhonaah hian resource person Dr C Vanlalhriatchhungi, Mizoram Pollution Control Board-a environmentel engineer PC Lalmuanpuii, Aizawl Smart City-a deputy CEO V Lalruatliana leh, Synod Hospital-a Pathology HoD Dr Lalnunnemi ten thil pawimawhte an zirtir a ni.