Vaivakawna ruihhlo ngai kal khawm ṭhin zinga 60% vel ṬBCC aṭanga chhuak an ni

Hun eng emaw ti aṭang khan Vaivakawn veng chhungah ruihhlo ngaite an pung khawm ṭhin a, an tam zual lai chuan mi 200 an chuang ṭhin. Kal khawm ṭhin zinga 60% vel chu Ṭawngṭai Bethel Camping Centre aṭanga chhuak an ni.

Excise & Narcotics minister Lalnghinglova Hmar chuan nimin khan a pisaah Excise & Narcotics department hotute leh Vaivakawn Siamṭha Pawl (VSP) hruaitute Vaivakawna ruihhlo ngai pung khawm ṭhinte buaipui dan tur a sawipui.

Lalnghinglova Hmar chuan, Mizorama ruihhlo ngai an pung zel chu pawi a tih thu sawiin, "Vaivakawn, Rangvamual leh a chhehvelte hi awm khawmna hmunpuiah an hmang a, a veiawm tak zet. Khawtlang nen ṭang rualin 'A Senchi Lane' tihtawp a ni tawh a, khawtlang nen ṭangrual bawkin ruihhlo ngaite hmunpuia an hman ṭhin hi tihrêm kan tum tur a ni," a ti a; hmalakna hmasa atan VSP hnenah Rs 20,000 a hlan.

VSP hruaitute chuan, an vengah Aizawl leh khaw dang aṭangin ruihhlo ngaite an kal khawm ṭhin tih sawiin, "An pun khawm tam lai chuan mi 200 chuang an ni ṭhin. Khawlai hmun ualau tak taka inchiute an awm fo avangin nunau tan a him lo a, rûkruk leh inrawk a pun phah nasa," an ti a; biak-in, anganwadi centre, YMA Property House bakah mimal in eng emaw zat rawk a nih tawh thu an sawi.

Vaivakawn veng chhunga ruihhlo ngai pung khawmte chu pawl hrang hrangin ei tur an pe ṭhin tih sawiin VSP hruaitute chuan, "Hei hian ruihhlo ngai pung khawm a tihtam phah a, ei tur pe turte chu min rawn hriattir hmasa ṭhin turin thuchhuah kan siam," an ti.

END commissioner Z Lalhmangaiha chuan, END-in zirchianna an buatsaihah ruihhlo ngai zinga 80% vel chu hawna tur in nei, ruih duh vanga Vaivakawn leh a chhehvela kal khawm an nih thu a sawi a, "Kal khawm ṭhin zinga 60% vel chu Ṭawngṭai Bethel Camping Centre aṭanga chhuak an ni a, 5% vel chu Hulhliap Project aṭanga chhuak niin, a bak 35% vel chu hmun dang aṭanga kal khawm an ni," a ti. END-in tlaivarin Aizawl khawpuiah mobile duty an neih ṭhin thu a sawi bawk.