Faina beihpui thlak pualin hun hmang

Nimin khan Kolasib-a UDPA department conference hall-ah 'Clean Home Door to Door on SABB' leh 'Supply of Clean Drinking Water' campaign buatsaih a ni a, bawrhsap Robert C Lalhmangaiha'n a hmanpui.

Campaign hi DAY-NULM manager Zothanmawia Hrahsel-in a kaihruai a; Bawrhsap chuan, faina kawngah hmasawnna a awm theih nan sorkarin theihtawp a chhuah ṭhin thu sawiin, "Mipuite'n department hmalakna leh an ṭhahnemngaihna kan ṭâwiawm a ngai," a ti a; district fai leh thianghlim ber an nih theih nan ṭan la turin kal khawmte leh district mipui a sáwm.

Robert C Lalhmangaiha chuan, Kolasib mipui tui tlan hnâr enkawl dan chu a lungawi thlak loh tih sawiin, "Bawlhhlawh senghawi leh dah bo kawngah department chuan theihtawp a chhuah a, sorkar lam aṭanga thâ kan thawhna hi mipuite'n hriain kan zawm ve a ngai a, VC, NGO leh kohhran ang pawha faina lam inzirtir nasat a ngai," a ti a; Kolasib-ah ui seh vanga hospital panpui ngai ni tin an awm chu inenfiah a ngaih thu sawiin, mahni ran vulh ṭheuh khuahkhirh turin mipui a chah bawk.

Kolasib-a UDPA officer Josephine Zonunsangi chuan, 'Clean Home Door to Door' leh 'Supply of Clean Drinking Water' campaign neih turah self help group member-te chu ambassador an nih thu leh, campaign-ah hian Kolasib khawpui tihfai ngaih pawimawh a ṭul thu a sawi.

Inkhawmah hian DAY-NULM manager H Lalremruati'n campaign neih dan tur a sawifiah a; 'Faina thutiam' sawi rual a ni.