Class XII science leh maths zirlaibu Mizo ṭawnga buatsaih tlangzarh a ni

Education minister Dr Vanlalthlana chuan nimin khan Mizoram Board of School Education (MBSE) conference hall-ah Mizo ṭawnga science zirlaibu siam thar a tlangzarh.

Dr Vanlalthlana chuan, National Education Policy 2020-in a beisei angin zirlaibu eng emaw zat chu Mizo ṭawnga buatsaih a nih tawh thu a sawi a, "Class XII science leh mathematics zirlaibu hman tur, Mizo ṭawnga buatsaih a, tlangzarh a ni leh hian Mizoram chhunga zirnain hmasawnna a hmuh phah ngei ka beisei," a ti.

Pawl 12 science zirlaibute copy 700 ṭheuh chhuttir a ni a, Physics, Chemistry, Biology leh Mathematics a ni. MBSE hmalaknain November 30, 2022 khan pawl 10 mathematics leh science subject textbook (Mizo ṭawng) tihchhuah a lo ni tawh a; pawl IX methematics leh science textbook pawh February 6, 2023 khan tihchhuah a ni. Pawl 11 Physics, Chemistry, Biology leh Mathematics textbook-te chu June 28, 2024 khan tlangzarh a ni tawh bawk.

Pawl 9 leh 10 zirlaibute hi MBSE-in copyright a neih a nih avangin translation type-a buatsaih a ni a; pawl 11 leh 12 zirlaibute erawh chu mi dangin copyright an neih theih avangin translation ni loin, mithiamte'n lehkhabu dangte rawn chunga anmahnia an buatsaih a ni thung.

Education Minister chuan, Sap ṭawng leh ṭawng dangte thiam a pawimawh rualin, mahni pianpui ṭawng hlamchhiah phah nana hman erawh chu hnam anga boralna thlentu a nih theih thu a sawi a, "Mizo ṭawnga zirlaibu buatsaih hi hnam humhalhna kawnga hmanraw pawimawh tak a nih ka beisei," a ti.

MLA T Lalhlimpuia pawhin thu sawiin, khawtlangah ngaihsan tur dik leh ngaih pawimawh tur dik thlan thiam a pawimawh thu leh, zirnaa hlawhtling turin zirna tibahlah theih thil danga inhman tam loh a pawimawh thu a sawi.

School Education special secretary David Lalthantluanga chuan, Mizorama sikulte chu National Education Policy-in a phût angin State School Standard Assessment (SSSA) hmanga endik ṭhin a nih tur thu a sawi a; India ram pum huapa inelna hrang hrang - NEET leh JEE-a Mizote dinhmun enin, Mizorama zirna kalpui dan thlir let leh ṭan lak ngaihna lai zir chian a, hmasawn tura inbuatsaih a pawimawh thu a sawi bawk.