Kum 51 mi a chennaah thah a ni; Tualthattua puh police-in an man

Vanlalhnuna (51) h/o Lalremmawii (L), Bawngkawn chu July 16, Nilaini zan khan a chenna inah thah a ni a, a thattua puh Felix Lalthansanga (25) s/o Lalthanzuala (L) leh thil thlen laia awm ve Cindy Zoramchhani (21) d/o Lalliana, Lengpui Vengthar nia insawite police-in an man nghal.

Police aṭanga thu dawn danin, Bawngkawn Police Station chuan July 16 zan dar 7:15-ah Bawngkawn Branch YMA President aṭangin tualthahna a thlen thu an dawng a, enfiah turin an kal nghal.

Vanlalhluna hi mi in luahin, amaha khawsa a ni a; a mut pindanah thichhawnga hmuh niin, a khabe, mit veilam leh beng veilam, a chal veilam leh a bán veilamahte a hliam a, zan dar 7 velah a thi.

Tualthahna hmuna awm Felix Lalthansanga leh hun rei tak a lo kawp tawh Cindy Zoramchhani te chu police-te'n manin, thu zawhfiah atan an hruai nghal a ni. Forensic Sciene Laboratory lam pawhin thil ṭulte an buaipui bawk.

Vanlalhluna, Felix Lalthansanga leh Cindy Zoramchhani te hian zu an inho a; Felix Lalthansanga chu Vanlalhluna leh Cindy Zoramchhani te awm danah a thinrim a, Vanlalhluna chu kut a thlâk niin police a hrilh. Cindy Zoramchhani chuan a ruih lutuk avangin hriat a neih loh thu a sawi thung. An pahnih hian nimin khan jail-ah dah an ni.

Vanlalhluna hi Nilaini zan khan lumen a ni a, nimin chhun khan vui a ni.