MPYCC-in CM leh minister-te bâng turin phût

Mizoram Pradesh Youth Congress Committee (MPYCC) chuan, ZPM party kaihhruai sorkar chu mawhphurhna la ngam loah puhin, Chief Minister leh minister-te chu báng turin an phût tih a sawi.

MPYCC hruaitute chuan nimin khan Durtlang-Kawnpui inkar tlang kawng leh Vairengte leh Kawnpui inkar NH kawngpui a hmunah an tlawh a; kawng enkawltu NHIDCL leh kawng siamtu Balaji leh Randu Construction hotute an kâwm nghal.

Congress ṭhalaite chuan, "Mawhphurhna hre lo leh la ngam lo ZPM sorkara Chief Minister leh minister-te báng turin Congress ṭhalaiin a phût," an ti a; CM leh PWD Minister-ah mi dang dah a nih hma chuan kalphung tharah beisei tur a awm lo niin an tarlang.

Congress ṭhalai president Laltawnliana chuan, kawngpui chhia chungchangah chief minister Lalduhoma leh PWD minister Vanlalhlana te chu mawhphurhna la ngam loah puhin, "Dâwt sawia mipui bumna thu sawi kual mai mai lo hian an nihna hi mi dang kian se, Mizoram mipui hnena an inzawrhna kalphung thar a beisei awm zawk," a ti.

MPYCC President chuan, CM leh ZPM sorkarin kawng siamtute an thunun ngam lo nia sawiin, "An ngenna leh nawrna pawh engah mah an ngai lo," a ti a; ZPM sorkar aiin Mizoram BJP President thar Dr K Beichhua ngenna kawng siamtute'n an ngai pawimawh zawk nia sawiin, chu chuan ZPM sorkarah thil a harsa deuh deuh dawn tih a tilang niin an sawi bawk.