KHAWTHLIR

Thisen pe

Mualpui Police Kohhran chuan nimin khan thisen pek an huaihawt a, Civil Hospital, Aizawl tan thisen unit 27 an pe a, petute mipa 25 leh hmeichhia pahnih an ni.

Phone bo pe lêt

Bawngkawn Police Station chuan, mobile phone bo report an dawn, CEIR hmanga an hmuh chhuah lehte chu nimin khan a neitu mi 17 hnenah an pe lêt. Bawngkawn PS hian March 2025 aṭanga nimin thleng khan mobile phone bo report an dawng zinga 137 chu an hmuh chhuahsak tawh a ni.

Lirthei registration tinung turin hriattir

Serchhip District Transport Officer chuan hriattirna chhuahin, The Central Motor Vehicle Rules, 1989-in a sawi angin vehicle registration chu kum 15 a tlin hma ni 60 chhunga tihnun thar (renew) ṭhin tur a nih thu a puang a; registration certificate thi tawhte khalh chhuah phal a ni lo tih a tarlang. Serchhip DTO hian an district-a lirthei kum 15 tling tawh, registration thi tawhte chu thla thum chhungin registration tinung vek turin a hriattir a ni.

Leiṭha sawiho

Saitual district bawrhsap Dr Lalngura Tlau kaihhruaiin nimin khan District Vigilance Committee on Fertilizer an ṭhukhawm a; mipui hnena mumal zawka leiṭha (fertilizer) supply kalpui dan tur leh wholesale dealer-te'n khaw tinah retailer mumal an neih theih dan turte an sawiho. Bawrhsap chuan, fertilizer kawngbo a awm ṭhin chu pawi a tih thu a sawi a, "Hun kal tawh chu theihnghilh ila, tun aṭang hian bul ṭan ṭhain, dik takin theihtawp chhuah tlang ang u," a ti.