MSU-in MSU kaihhnawiha thu dik lo hmanga inpuhna awm a pawi an ti

Mizo Students’ Union Gen. Hqrs chuan thuchhuah siamin, tun hnaiah social media hrang hrangah MSU kaihhnawih thilah thu dik lo hmanga inpuhna awm chu pawi an tih thu an tarlang a; thil awmzia an sawifiah.

Myanmar buaina vanga Zo hnahthlak raltlante chu an lo buaipui ṭhin a, USA aṭangin medical equipment-te chah lutin chhawmdawl hna an thawk ṭhin tih an tarlang a, "Hetiang thil buaipui a nih lai hian Myanmar lama kan unaute leh zirlai pawl kan thawhpui Chin Students’ Union phungbawmah sàwm ṭhin an ni. Tun hnaia social media-a hming rawn lang William-a hi kum 2022 chhung khan Chin zirlai raltlan harsatna tâwkte buaipui turin ruat a ni a, ani chauh lo pawh pawl thlei bik awm loin a remchan dan ang angin kan thawhpui ṭhin," an ti.

Tuna MSU hruaitu term kal mek, kum 2024 aṭanga hruaitu thar kaihhruaina hnuaiah erawh chuan Myanmar unau pawlte zingah thawhpui an la nei rih lo tih MSU an sawi a; chutih rualin, ṭanpui an ngaihnaah chuan theihtawp chhuah turin an inhawn reng thu an tarlang.

MSU chuan, Zo fate chu an duh vang ni loin ram pathum - India, Myanmar leh Bangladesh-ah te ṭhen darh an nih thu sawiin, "Ram hran sorkar awpbehna hnuaiah awm rih mah ila, unau kan nihna vawng nung reng turin ram hrang hranga Zo fate kan ngen a, 'Ramin rî nei mah se, hnamin rî a nei lo' tih hi MSU thuvawn a ni," an ti.

Tun hnaia Myanmar buaina vanga Zo hnahthlakte inkara inhriatthiam lohna a awm leh ralthuam lek a ni chu pawi an tih tak zet thu an tarlang a; remna hawi zawnga ke pên turin Myanmar-a Zo hnahthlak pawl hrang hrangte an ngen a ni.