Parking/no parking mahnia rîn phal loh

Lunglei Municipal Council hnuaia Traffic and Transport Coordination Comm­ittee chu an chairman K Lalrinawma, LMC vice chairman kaihhruaiin nimin khan LMC BoC meeting hall-ah an ṭhukhawm. Pawl, mimal leh dawrte'n mahni thua lirthei dinna emaw, mahni lirthei hunna tur emaw hauha 'parking/no parking' lo rîn ve ringawt chu phal a nih loh thu an tarlang.

Ṭhutkhawmah hian, sorkarin lirthei dinna leh chànna hmun atana ruahmanna a siam leh a chhinchhiah chin tih loh chu pawl, mimal leh dawrte'n an mahni thua chhinchhiahna lo rîn emaw, mahni lirthei hunna tur lo hauha 'parking/no parking' lo rin ve chu phal loh a nih thu tarlan a ni a; LMC huam chhunga mipuite chu thuneitute ruahmanna ngaichânga zâwm turin an ngen nghal a ni.

K Lalrinawma chuan, Lunglei khawpuiah lirthei tlân dan leh hùn dan felfai leh ṭha zawk a awm theih nan insingsak mek a nih thu a sawi a, "Hma hun thui tak thlir lâwk chunga ruahmanna siam a ṭul," a ti.

Meeting-ah hian sorkar office, lirthei hmang­a ei zawng pawl hrang hrang, veng leh kohhran aṭanga lirthei dinna leh chànna hmun (parking & stand) chung­­­changa dilna leh rawt­na lutte an thlirho a ni. LMC-in Lungleia sumdawng lirthei - taxi, two wheeler taxi, auto rickshaw, maxicab leh pik-up te dinna hmun rua­hman dan leh a taka hman a nih dan an zirchianna an thlirho bawk.