Bairabi-Sairang rêl kawng thar PM-in a hmunah hawn a tum

Chief minister Lalduhoma chuan nimin khan prime minister Narendra Modi chu Delhi-ah a chenna inah a kâwm a; Prime Minister chuan, Bairabi-Sairang rel kawng chu remchang hmasaah a hmun ngeiah hawn a tum thu a lo hrilh.

CM Lalduhoma hian Prime Minister hi Bairabi-Sairang rêl kawng siam thar leh Sairanga rêl chawlhhmun chu hawng turin a sáwm a; Narendra Modi chuan, hun remchang hmasaah a hmun ngeiah hawn a tum tur thuin a chháng a ni.

Chief Minister hian Prime Minister hi Aizawl mipuite'n gas cylinder ngai tawh loa pipe line hmanga gas connection an neih theihna tura Indradhanush Gas Grid Limited (IGGL)-in cheng vbc. 9,265 senga Tripura aṭanga gas pipeline project an kalpui mek chungchang a sawipui a; PM Modi chuan, pipeline kaltlangna tur Mamit district DC-in chak lehzualin hma la se a duh thu a sawi.

Inkawmnaah hian Thenzawla Peace City din, Aizawl-Thenzawl kawngpui national highway-a siam leh Handholding policy hmalakna chungchang te, tun hnaia Myanmar Chin state-a buainain Mizoram a nghawng dante an sawi dun a ni.