Mizoram Larsapin Champhai a tlawh: 'Raltlante ṭha tak leh mumal taka chhinchhiah a pawimawh' - Governor

Governor Gen. Dr Vijay Kumar Singh chuan nimin khan Champhai district a tlawh a; raltlante ṭha taka chhinchhiah a pawimawh thu leh nakin zela khawtlang leh ram tana nghawng ṭha lo a thlen loh nan lo inpuahchak lâwk a ṭul thu a sawi.

Gen. Dr Vijay Kumar Singh hian DC conference hall-ah Champhaia sorkar department hotute a kâwm a; Champhaia Assam Rifles COB pawh tlawhin, 23 Sector DIG Brig. Pushpendar Sorayan leh hotu dangte nen an inkâwm bawk.

Governor chuan Myanmar aṭanga raltlante chungchang sawiin, "Raltlante ṭha tak leh mumal taka chhinchhiah a pawimawh. Resource kan neih tam bik loh avangin nakin zela kan khawtlang leh ram tana nghawng ṭha lo a thlen loh nan kan lo inpuahchah lâwk a ṭul. Champhai district hi ramri kaltlanga ruihhlo tawlh rukna lian a ni a, ruihhlo tawlh ru ṭhinte man chhuaha an phu tawk hremna pek zel a ṭul," a ti.

Zirna ngaih pawimawh a ṭul thu leh zirna-inte chu zirlaite tana ngainatawm taka siam a ṭul thu sawiin Larsap chuan, "India rama exam hautak leh hna lak lian thamahte Mizote kan lan tam theih nan theihtawp chhuah a ṭul," a ti a; sorlar laipui scheme hrang hrang tihhlawhtlin kawngah ṭan la lehzual turin sorkar hotute a chah bawk.

Champhai bawrhsap Mohammad Aaquib tarlan danin, tun hnaiah Myanmar ramria inkahna thleng vangin Champhai district-ah raltlan 4,653 an lut a, raltlante buaipui kawngah lungrual takin theihtawp chhuah a ni.