ACB-in thubuai khawih lai 25 an nei

Mizoram Anti-Corruption Bureau (ACB) chuan thubuai chhui lai mek 12 leh preliminary enquiry tih mek 13 an nei a; kumin bikah thubuai pali leh preliminary enquiry pasarih an chhui zo tawh.

Chief secretary Khilli Ram Meena, chief vigilance officer ni bawk hoin nimin khan Mizoram ACB hotute chu CS Conference Hall-ah an ṭhukhawm a; Mizorama ACB hnathawh kal mekte leh tun hnaia ACB hmasawnna leh hmalaknate sawiho a ni.

Ṭhutkhawma ACB SP Lalbiakkila tarlan danin, tun dinhmunah Mizoram ACB hian thubuai (case) chhui lai (investigation tih mek) 12 leh preliminary enquiry tih mek 13 an nei a; kumin 2025 bikah regular case pali chhui zo tawhin, preliminary enquiry chhui zawh tawh pasarih an nei bawk.

Khilli Ram Meena chuan, ACB staff-te hnathawh chu fakawm a tih thu leh a thlàwp tlat thu a sawi a, "Ṭan la thar zel u la, ram dan leh hraite uluk taka zir chiangin, eirukna do kawngah theihtawp chhuah zel ang che u," a ti.

Ṭhutkhawmah hian Vigilance secretary Betsy Zothanpari Sailo leh ACB director J Lalṭhafamkima bakah, Vigilance department-a officer-te leh ACB hotute an tel a ni.