Ṭhangtharte'n aia upate zahna an nunpui a pawimawh - Prof. Lalnilawma

Minister of state Prof. Lalnilawma chuan, Mizoramin hmasawnna dik leh ro tling a neih zel theih nan sorkar thawhpui turin mipui a sáwm a; ṭhangtharte'n aia upate zahna an nunpui a pawimawh thu a sawi.

Prof. Lalnilawma hian nimin khan a bial chhunga MUP, Thingsulthliah Branch I & II golden jubilee lawmna a hmanpuinaah thu sawiin, "Kan pi leh pute hun aṭangin aia upate zah kan inzirtir ṭhin a, hei hi ṭhangtharte hian kan nunpui chhoh zel a pawimawh. Upate'n an daihriat aṭanga kawng an lo sial tawh chu ṭhangtharte'n kan zawh zel a pawimawh a ni," a ti.

Upate chu ram leh hnam lo humhalha lo vawng nungtu an nih thu sawiin Lalnilawma chuan, "In finna leh thiamnate hmang ṭangkai apiang hi mi fing leh vannei kan ni dawn. Upate uapna hnuaiah kan ram hian hmasawnna ke a pên zel ka beisei," a ti a; upate chu ràl thlir mai lo a, ram tana hma hruaitu ni zel tur leh sorkar thawhpui zel turin a sawm.

MUP, Thingsulthliah Branch jubilee lawmna hi Thingsulthliah VC-II community hall-ah buatsaih a ni a, Minister hian jubilee lungphun a hawn bakah, MUP Gen. Hqrs president Nghaklianmawia'n jubilee souvenir a tlangzarh a ni.