Kum 2024-25-a NIT Mizoram aṭanga zir chhuak 97.1%-in hna an hmu tawh

National Institute of Technology (NIT), Mizoram director Prof. S Sundar chuan, kum 2024-25 chhunga an zirlai chhuakte zinga 97.1%-in company lian leh changtlung tak takah hna an hmuh thu a tarlang.

NIT, Mizoram Director tarlan danin, kum 2024-25 chhunga NIT-Mizoram aṭanga zir chhuak zinga 97.1%-in company lianah hna an hmu a; chu'ng zingah chuan Mahindar & Mahindra, Vedanta, L&T, Tata Electronics, Deloitte, Ashol Leyland, Lumiq AI, Adani Wilmer, TCS, Cognizant, Capgemini, Kalpataru Projects, Saint Gobain, Digit. GA Infra, Justpay leh APL Apollo Steel te an tel.

Kum 2024-25 chhungin NIT-Mizoram hi SAIL, Indian Railways, Bureau of Indian Standards, Google, Microsoft leh Mizoram sorkara PHED leh PWD nen an thawkho a, B.Tech zirlaite tan industrial intership buatsaih a ni.

Prof. S Sundar chuan, kum 2024-25 chunga NIT-Mizoram aṭanga zir chhuak zinga 97.1%-in eizawnna ṭha tak an hmu nghal chu NIT-Mizoram hmasawnna tichiangtu a nih thu a tarlang a; '5G Use Case Laboratory' hmang thei turin technical higher education institute 100 thlan zingah NIT-Mizoram a tel tih sawiin, hei hian internet hmanga inthun zawmna ṭha hmanga tunlai thiamna ṭangkai zawka hmanna kawngah hmasawnna nasa zawk a thlen a beisei thu a tarlang bawk.

Tarlan danin, NIT-Mizoram hi Bureau of Indian Standards, NITTR Chennai, Indian National Academy of Engineering, IIM-Visakhapatnam leh Institute of Engineers (India)-te a thawhpui mek a; NIT Mizorama B.Tech third year zirlaite'n Common Admission Test paltlang ngai tawh loin IIM-Visakhapatnam-ah MBA an zawm thei a, kum 2025-ah zirlai 14-in an zawm a ni.

Zirlaite'n intuaihriamna leh tawnhriat tam zawk an neih theih nan IIT Madras, Kanpur, Patna, Bhilai, Benaras Hindu University-ahte intership programme siam a ni a; IIT Guwahati, Airport Authority of India, Mizoram Science, Technology and Innovation Centre (MISTIC) leh Software Technology Park of India te nen thawhhona thuthlung siam a ni bawk.