CM-in honorary doctorate degree a dawng

Chief minister Lalduhoma chuan July 12, Inrinni khan Karunya Institutes of Technology & Sciences (Deemed to be University), Coimbatore, Tamil Nadu convocation vawi 31-na a hmanpui a; Karunya University hian honorary doctorate degree an hlan.

CM Lalduhoma chuan, Karunya University-in honorary doctorate degree an pek an tum chu Mizoram, ziak leh chhiar thiam vekte chenna ram mipui aiawha dawng turin thu a tihtluk thu a sawi a, "Zirnain hmasawnna leh changkanna min thlen zel a ni tih lantirnaah ka ngai a, honorary doctorate degree min hlan avangin ka lawm tak zet," a ti.

India rama zirna-in ṭha tam tak chu Kristiante din leh enkawl an nih thu sawiin Lalduhoma chuan, "Zirna te, hriselna te, hnuchham enkawlna leh khawtlang rawngbawlna kawng dangah pawh ram pum huapa mipui awm zat aṭanga tehin tlem hle mah ila, ringtute hian kan thawh hlâwk ṭhin," a ti a; Karunya University pawh chutiang rilru pu chunga din leh kalpui a nih thu a sawi.

Chief Minister chuan, zirlai hlawhtling tharte chu tih tum bulfûk nei loa hlawhtlinna a pawnlawi fo tih hre tura chahin, ram leh khawtlang tana mi ṭangkai tak nih tumna nei turin a fuih a, "Khawvel hian mithiam a mamawh belh satliah lo a, mi dangte ṭhatna tura inpe, hmangaih taka rawng min bawlsaktu tur mithiam a mamawh a ni," a ti.

Karunya University hian Lalduhoma hnena honorary doctorate degree an hlan chhanah, "Hmingṭha taka khawtlang rawng a bâwl ṭhinna te, hmathlir ṭha tak nei ram hruaitu a nih vang te, remna leh muanna a awm theih nana nghîng loa a inpek ṭhinna te, hmasawnna leh mipui sorkar dinna kawnga a hnathawh ṭha tak takte vang," a nih thu ziah a ni.