Aizawla lirthei intlan chhâwk tihdanglam chhin a ni dawn

Coordination Committee on Traffic Management chuan Aizawla lirthei intlan chhâwk dan chu thla khat chhung tihdanglam chhin an rêl a; lirthei tlan loh nía m-pass hmanga tlan phalna pek ṭhin chu essential service tan chauh pek tawh an rêl bawk.

Coordination Committee on Traffic Management hi nimin khan CS conference hall-ah chief secretary Khilli Ram Meena kaihhruaiin an ṭhukhawm a; kum 2019 aṭanga Aizawla lirthei intlan chhâwk dan chu thla khat chhung atan tihdanglama enchhin an rêl a ni.

Committee rêl dan chuan, Aizawla lirthei intlan chhâwk kalpui mek chu Aizawl khawpui chhunga tlangdung kawngpui (main spine) Bawngkawn-Kulikawn via Chaltlang, Ramhlun-Chanmari-Zarkawt-Dawrpui leh, Sikulpuikawn-Chanmari West via Temple Square-Vaivakawn leh Hunthar Vengah chauh thla khat chhung enchhin a ni ang.

Coordination Committee chuan, lirthei tlan loh nía M-Pass hmanga tlan phalna (permit) pekah essential service (pawimawh zual bik) tan chauh pek tawh ni se, an ti.

Taxi-te chu sticker A, B, C hmanga tuna an intlan chhâwk danah chawlhkar khata tlan loh ní ni hnih an nei a; meeting chuan, kar khatah ni khat chauh tlan loh ní an neih theih nan sticker A, B, C, D, E hman ni se, an ti a, August 2025-ah enchhin tura ruahman a ni.