Minister-in chhanchhuahna hmanrua sem

Disaster Management and Rehabilitation (DMR) minister Prof. Lalnilawma chuan nimin khan DMR Directorate conference hall-ah Mizorama sorkar, khawtlang leh tlawmngai pawlte'n khuarel chhiatna a lo thlena an hman tur chhan­­­chhuahna hman­ruate a sem.

Chhanchhuahna hmanruate hi District Disaster Management Authority te, MAP leh IR battalion hrang hranga State Disaster Response Force te, Village Disaster Management Committee leh tlawmngai pawlte hnenah sem a ni. Indian Red Cross Society, Mizoram State Branch-in DMR hnena blanket 300 an pek chu Champhai district-a hman turin sem nghal a ni bawk.

Prof. Lalnilawma chuan, DMR depart­ment-a thawk te, SDRF, DDMA leh chhanchhuah hna thawka che chhuak ṭhin pawlte chu khawtlang thlamuantu, Zo nun ze mawi - tlawmngaihna leh huaisenna pho chhuak ṭhintute an nih thu a sawi a, "Ram leh hnam tana hna ropui tak thawktute an ni," a ti.

Chhanchhuahna leh chhawmdawl hna thawk turin hmanraw ṭha a pawimawh rualin, thawktute'n rilru leh taksa hrisel an neih a pawimawh thu sawiin DMR Minister chuan, "Hmanrua kan neih ang angte uluk taka enkawl a ṭul a, a hun takah a nihna tur ang taka hman ṭangkai a nih theih nan a hmangtu turte pawhin hmanruate hi kan hriat chian a ṭul," a ti. Khuarel chhiatna tam zawk chu mihring fimkhur loh vanga thleng thei a nih avangin sorkarin fimkhurna tur thupek a siamte zawm turin mi tin a ngen bawk.

Inkhawmah hian 'Leimin laka inven dan' tih thupui hmanga video tawi insiamsiak lawmman sem nghal a ni.