Bialtu MLA-in Theiriat leimin a enfiah

Lunglei South bialtu MLA Lalramliana Papuia chuan a bial chhung Theiriata National Highway-54A kawng laih zauh vanga Sethlun-Theiriat kawng chung PWD road min bal ta vanga lirthei leh mihring kal theih loha awm mek chu nimin khan a hmunah a enfiah.

Lalramliana Papuia chuan, Theiriat kawng chung ping mek vanga mipuite'n harsatna an tawh mekah YMA-in kawng min lai hêlna atana kea kalna an siam chu a theih anga hmanrua ngaihtuahpui turin NHIDCL hotute a chah a; NHIDCL hotute chuan tihhlawhtlin an tum tur thu an sawi.

NHIDCL hotute chuan, leimin vanga kawng ping ṭhinah a then faina tur JCB pahnih an chhawp thu leh, theihtawpin kawng then fai hna leh lirthei veivakte ṭanpui hna an thawh ṭhin thu an sawi bawk.

MLA hi Lunglei DC Naveet Mann, Disaster Management & Rehabilitation, PWD, Geology & Mining leh Public Health Engineering department hotu te, National Highways & Infrastructure Develop-ment Corporation Limited (NHIDCL) aiawhte leh LMC Ward-X Councillor leh Theiriat khawtlang hruaitute'n an ṭawiawm a ni.