Mobile phone bo hmuh lehte pe lêt

Lunglei Police chuan nimin khan Lunglei Police Station-a Cyber Cell hmalaknaa mobile phone bo leh rûkte CEIR portal hmang an hmuh let 20 chu a neitute hnenah an pe lêt. Phone bo hmuh let, a neitute hnena pek lêt hi Rs 2,90,365 hùa chhût a ni.

Mobile phone pek lêtna inkhawmah Lunglei additional SP K Beihmotaosa chuan, "Mobile phone zawn chhuah hi thil awl tak a ni lo. Phone bo hi Lunglei mai ni lo, Mizoram leh India ram hmun dangah a tam em em a, mobile phone tibo report awm tawh phawt chu a tam thei ang ber chhui chhuahsak zel kan tum," a ti.

Lunglei Additional SP chuan, mobile phone bo an hmuh leh theih chhan chu CEIR portal awmze nei taka an hman ṭangkai vang a nih thu sawiin, "Mobile bo rinhlelhawm tih hre reng chunga lo leisaktute emaw, lo thleng tute emaw chungah pawh action lak zel a ni dawn," a ti a; tun hnaiah dik lo taka phone bo/rûk leitu man an awm nual tawh thu a sawi.

Nimina mobile phone 20 an pek lêtte chu April 2025 aṭanga July 5, 2025 chhunga hmuh lette a ni a; Lunglei Police hian mobile phone bo leh rûk mi 170 an hmuh letsak tawh a ni.